內地教育界「頂流」網紅、以毒舌拆解升學就業見稱嘅考研名師張雪峰，尋日（24日）驚傳喺蘇州猝逝，終年 41 歲。其創辦嘅教育公司「峰學蔚來」喺尋晚深夜正式發出訃告，證實張雪峰因「心源性猝死」，經全力搶救後不治。消息一出，隨即衝上微博熱搜榜首，閱讀量喺短短幾個鐘內突破 30 億次，震撼成個內地互聯網。
據了解，事發喺 24 日中午。平時熱愛跑馬拉松、經常喺社交平台「打卡」跑步紀錄嘅張雪峰，當日喺公司健身室運動之後突然覺得胸口不適。未幾，佢就出現心臟驟停徵狀，隨即被送往蘇州大學附屬醫院。有目擊者影到，當時張雪峰躺喺擔架上面，雙眼緊閉，醫護人員瘋狂推車衝入急救室。可惜，雖然醫療團隊用盡全力，最終仍喺下晝 3 時 50 分宣告「回天乏術」。
張雪峰生前曾喺直播間開玩笑話：「如果有一日我死咗，熱搜一定係『張雪峰去世』，我希望成為一代人嘅記憶。」點知呢句「豪言」竟然一語成讖，令無數學生同家長唏噓不已。
張雪峰之所以紅遍全國，係因為佢敢於打破教育界嘅「糖衣包裝」。佢最出名嘅觀點係主張窮人家孩子報考大學應該以「就業」為唯一導向。佢曾經喺直播中直言：「文科係咩？文科即係服務業，總結成一個字就係『舔』。」
呢番言論當時引起軒然大波，多間大學教授出面痛斥佢「功利」、「扼殺理想」。但對於好多基層家庭嚟講，張雪峰係唯一一個肯講真話嘅人。有網民留言：「教授講理想係因為佢哋有鐵飯碗，張老師教我哋點樣喺現實社會生存，佢係我哋窮仔嘅引路燈。」
除了教育觀念，張雪峰嘅愛國言論亦經常成為話題。佢曾喺一次演講中情緒激昂咁表示：「祖國統一戰爭槍聲響嗰刻，我至少捐5000萬。公司帳面永遠有呢筆錢，整體起碼捐一億！」呢番熱血表態令佢收穫大量「愛國粉」，亦令佢喺內地政經界嘅影響力進一步擴大。
然而，人紅是非多。佢近年亦因為高額嘅志願填報諮詢費（傳聞一對一諮詢收費過萬）而被質疑係「割韭菜」。但無論評價點樣兩極化，佢嘅離去無疑標誌住一個「草根逆襲」偶像嘅隕落。
對於 41 歲正值壯年就猝然長逝，網上討論非常熱烈。有唔少人認為張雪峰係「過勞死」，因為佢一年 365 日幾乎日日直播，仲要打理公司、全國巡演，體力透支極大。
「佢幫咁多人揀咗最好嘅出路，但最後冇幫自己揀一條長命啲嘅路。」一位學生喺張雪峰嘅微博下留言。亦有網民感慨，張雪峰一生追求「效率」同「結果」，連離開都快到令人措手不及。
