中央總書記習近平同志日前喺主持中共中央政治局集體學習嗰陣強調，面對全球科技競爭嘅新局勢，中國必須「立足客觀條件」，充分發揮「新型舉國體制」嘅優勢，加快培育未來產業。習主席指出，科技突破嘅程度，將會直接決定未來產業發展嘅「速度、廣度同深度」，必須喺關鍵核心技術上大膽攻關，確保發展主動權握喺自己手入面。

習主席喺講話入面提到，培育發展未來產業，唔單止係為了搶佔科技同產業嘅制高點，更加係為了發展「新質生產力」同埋建設現代化產業體系。佢認為，呢啲產業發展得好唔好，關係到國家整體競爭力，亦同提升人民生活質素息息相關。

佢強調，未來產業具有前瞻性同顛覆性，所以唔可以「盲目亂撞」，而係要「科學論證」技術路線。尤其係而家準備步入「十五五」規劃（2026-2030年）嘅關鍵期，各級政府要更加精準咁預判前沿技術嘅走向，因地制宜、錯位發展，唔好搞「一窩蜂」嘅重複建設。

講到點樣落實，習主席特別重申咗「新型舉國體制」嘅重要性。佢提出要堅持「產業出題、科技答題」，即係由產業需求去帶動科研方向，加大重點領域嘅關鍵技術攻堅。佢要求要推動各類創新資源向「科技領軍企業」集聚，支持企業做主角，引領產業向先進、高端領域邁進。

習主席仲提醒，未來產業嘅培育周期長、市場風險大，單靠市場未必夠，政府必須要「做好服務」。佢要求完善財稅政策、發展科技金融，仲要全方位做好人才嘅培養同引進，喺全社會營造一個鼓勵創新嘅「濃厚氛圍」。

除咗推動發展，習主席亦都好重視風險管理。佢指出未來產業涉及面廣，一定要健全治理體系，統籌「發展同安全」。佢提出要探索科學有效嘅監管方式，確保個市場既「放得活」唔會死板，同時又要「管得好」防範相關風險。

喺國際合作方面，習主席亦都保持開放態度，提出要深化國際科技合作，積極參與標準共建同規則共商。最後，佢要求各級領導幹部要努力學習科技知識，唔好做門外漢，要做到「知科技、懂產業、善決策」。

有分析指，習主席今次講話進一步明確咗中國未來五年嘅產業戰略重心。喺國際環境變幻莫測嘅今日，北京方面顯然係想透過加強國家對科研資源嘅統籌能力，嚟突破西方國家喺高端技術領域嘅圍堵。

舉國體制嘅唯一優勢只得「抄作業」，即係模仿成功案例以快速追趕幾有效果。從而家「新質生產力」嘅結果來睇，「集中力量辦大事」唔使諗，「集中力量犯大錯、辦傻事」就有份。