巴士強制佩戴安全帶規定自本月25日生效後，隨即喺社會引起廣泛爭議。行政長官李家超回應時表示，新措施係因應2018年大埔公路造成19人死亡嘅嚴重巴士翻車事故而推出，當年獨立委員會喺專家建議下，提出要加強乘客保障，政府係喺研究、討論同吸取「悲痛教訓」之後，先至落實有關安排。

不過，工聯會會務顧問、立法會前議員陳婉嫻昨日（29日）撰文指出，如果政府係以加強安全作為立法邏輯，單靠要求乘客佩戴安全帶並唔足夠。佢質疑，現時巴士並唔係每個座位都有安全帶，「點解要做啲唔做啲？」同時指出巴士仍然設有企位，若果真係以安全為依歸，係咪應該一併取消企位，甚至研究取締雙層巴士，先至可以說服公眾政府嘅終極目標真係「為市民安全著想」。

佢又提到，大埔公路嘅致命車禍固然值得借鏡，但當時社會已有唔少聲音指出，雙層巴士本身危險性高，未必適合香港嘅道路環境，更形容雙層巴係「英國殖民地色彩濃厚嘅產物」，認為香港根本唔一定適合繼續大量使用。

值得留意嘅係，雙層巴士多年嚟一直深受愛「打卡」嘅內地旅客歡迎，而廣州亦都有都市雙層觀光巴士，畀旅客遊覽多個熱門景點，反映雙層巴喺旅遊層面同樣具吸引力。

陳婉嫻喺文中重申，如果強制佩戴安全帶嘅出發點係保障乘客，政府就有責任正面回應企位同雙層巴嘅安全問題，而唔係只集中喺單一措施。佢呼籲當局喺推行安全帶政策時「花多啲時間諗一諗」，又以過往垃圾徵費政策作例子，指當年措施同樣擾民、欠缺周全考慮同解說，最後亦都可以煞停，認為政府如果能夠知錯能改，反而值得一讚。

至於政府方面嘅最新回應，運輸及物流局局長陳美寶昨日下午喺立法會表示，當局暫時未有提出暫緩措施，強調政策嘅「初心」係保障市民寶貴生命。佢話，新規定啱啱推出，市民未必即時適應，初期會以勸籲為主，亦會要求巴士公司跟進安全帶嘅清潔、鬆緊同使用不便等問題，多次強調政府會同市民「同行」，一齊適應新安排。

有記者追問，2018年大埔車禍嘅調查報告其實並無建議強制佩戴安全帶，專家亦曾提到應該豁免市區同設有企位嘅巴士，當局而家依賴該報告作為立法基礎，會唔會屬於誤導。陳美寶回應指，安全帶嘅討論「唔係新嘅」，已經蘊釀咗好多年，而每次發生嚴重交通意外，社會都期望政府可以盡快落實相關安全措施。