委內瑞拉政局出現戲劇性發展。獲頒 2025 年諾貝爾和平獎嘅委內瑞拉反對派領袖馬查多（María Corina Machado），喺當地時間15日親赴白宮會見美國總統特朗普。會面期間，馬查多做出一個令外界震驚嘅舉動——將自己手上嗰枚諾貝爾和平獎金牌，親手獻畀特朗普，話係要表彰佢對委內瑞拉自由嘅「卓越貢獻」。

馬查多同特朗普喺白宮橢圓形辦公室進行咗約兩個半鐘嘅閉門會談。呢次係兩人首度正式面對面交流。會後，馬查多喺國會山莊接受記者訪問時證實，佢已經將獲頒唔夠三個月嘅諾貝爾和平獎獎章「送」咗畀特朗普。

馬查多形容呢次係一次「歷史性」嘅會面，佢強調：「我將呢枚獎章獻畀特朗普總統，係代表委內瑞拉人民表達感激，感謝佢對我哋追求自由嘅堅定支持。」佢更引用歷史，將呢次獻獎比喻做19世紀拉法葉侯爵向玻利瓦爾贈送華盛頓獎章，象徵美委兩國兄弟般嘅情誼。

一向對諾貝爾獎情有獨鍾嘅特朗普，隨後喺社交平台 Truth Social 出 Post，多謝馬查多嘅大禮。佢形容馬查多係一位「了不起、經歷過好多苦難」嘅女性，仲話：「馬查多將佢嘅諾貝爾和平獎畀咗我，表彰我所做嘅工作，呢個係互相尊重嘅美好表現。」

白宮隨後亦發放照片，顯示嗰枚獎章已經被放入一個精緻嘅相框，掛喺白宮入面。照片中可見獎章下面仲有一段致謝辭，寫明係要感謝特朗普「果斷採取行動」去確保委內瑞拉嘅自由。

雖然馬查多「畀足面」，但白宮方面嘅立場似乎未有因為呢份「重禮」而動搖。白宮新聞秘書李維特（Karoline Leavitt）喺記者會上雖然大讚馬查多勇敢，但亦重申特朗普目前嘅評估係「基於現實」。

據悉，特朗普政府雖然早前派兵逮捕咗馬杜羅，但目前並無表態支持馬查多接掌政權，反而傾向支持現任代理總統羅德里格斯（Delcy Rodríguez）。外界分析認為，特朗普係擔心馬查多喺委國內部實力不足，難以控制大局，加上雙方團隊早前關係惡化，令馬查多呢次「獻獎救國」嘅行動蒙上一層陰影。

針對馬查多「轉贈」獎章嘅行為，挪威諾貝爾委員會早前已經發出聲明「潑冷水」。委員會強調，諾貝爾和平獎係頒發畀特定個人或組織，絕對唔可以「轉讓、分享或者撤銷」。委員會發言人直言：「雖然實體獎章可以換主人，但得獎者嘅身份係永遠唔會改變。」

目前，馬查多仍然喺華盛頓同多名國會議員會面，試圖喺委內瑞拉重建民主體制嘅過程中，爭取更多實際嘅政治籌碼。