日本首相高市早苗上任唔夠兩個月，支持率已突破80%。日本多間主流媒體喺11月至12月做嘅民調顯示，高市內閣嘅支持度大部分都維持喺七至八成之間，部分調查仲衝到超過八成，係自2001年小泉純一郎之後，日本極少見嘅「超高人氣內閣」。

JNN喺11月初訪問超過一千名受訪者，支持率高達82%，係高市上台以嚟最高。其中20至30歲嘅年輕女性支持度接近「零反對」，相當罕見。《日經新聞》同東京電視台喺11月底嘅聯合民調亦錄得75%，比10月稍有上升。不支持率普遍下降，自民黨支持度亦回升到四成以上。

整體民調分布大致落喺64%到82%之間，而推動高市民望嘅主力，明顯係年輕人，尤其係女性，幾乎全部都對第一位上台嘅女首相表示歡迎，認為日本打破長期男權政治象徵，社會氣氛都有種「新鮮感效應」。

高市上任後迅速推出一系列減輕生活壓力嘅措施，包括廢除汽油稅、派米券、兒童津貼等等，直接針對通脹令市民負擔加重嘅問題。七成受訪者認為政策「實際」，接近七成認為有助改善經濟環境。亦有人指出，高市形象利落，與前任政府嘅「散亂感」形成鮮明對比，令民望更易拉升。

喺外交方面，高市早苗多次強調「台灣有事」可能構成「存亡危機事態」，可以觸發集體自衛權。雖然講法引起中日緊張，但日本國內有近五成受訪者認為佢講得啱，亦有接近六成支持增加防衛費，事件反而令高市民望再向上。

不過，日本嘅經濟基本面就冇民望咁好。政府修訂後嘅數據顯示，日本第三季GDP按年率倒退2.3%，係六季以嚟首次負增長，跌幅比原本估嘅1.8%更深。企業設備投資同住宅投資都比預期弱。

厚生勞動省公布，10月實質薪資再跌0.7%，已經連續十個月負增長。名義薪資雖然升2.6%，但仍追唔上物價升幅。日本通脹已經連續三年半高於央行2%目標，係90年代以嚟最長嘅高通脹期。

近期日圓亦長期企喺155兌1美元附近，推高進口成本，打擊消費。中日關係轉趨緊張亦可能拖累旅遊業，高盛估計，中港旅客若減半，會拖低日本GDP大約0.2個百分點。

高市10月宣布規模逾21萬億日圓嘅經濟刺激方案，希望喺壓住物價嘅同時推動增長，但「實質薪資上唔到」嘅問題依然卡住成個經濟。扣除自有住宅租金後，10月CPI升3.4%，反映工資追唔上物價嘅情況持續惡化。

壓力主要落喺中小企度。日本中小企佔全國企業99.7%，請咗超過3300萬人，係經濟命脈。但多年通縮令中小企習慣咗低價競爭，通脹一來，成本飆升，卻未必敢加價，因為內需疲弱，加價無門，結果兩邊受壓：通縮年代利潤薄，通脹年代成本爆。

日本政府最新經濟白皮書指出，中小企明顯比大企業更保守，更傾向持有現金，唔願做擴張性投資。帝國資料調查公司嘅統計就話，因為人手短缺而倒閉嘅企業喺4月至9月達到214間，比去年多31%，創歷史新高。