大埔宏福苑尋日發生五級大火，至今已經造成44死58傷，包括一名消防員殉職，仲有過百人失蹤，係香港近數十年最嚴重嘅火災慘劇。由舊年7月起，「宏福苑」開始進行大型維修工程，外牆包晒傳統竹棚；但今次大火撲熄之後，現場所見竹棚仍然大致完整，反而用嚟包覆嘅棚網幾乎燒晒變灰燼，引起公眾質疑承包商係咪為咗慳成本，選用咗廉價而冇阻燃功能嘅物料，先至令火勢完全失控。

呢場大火足足燒咗成晚未熄，令居民陷入極度驚慌同焦慮。由於起火時係日間，多數居民出去返工，留喺屋企嘅長者因行動唔方便，根本逃生無門。昨日（26號）現場有居民喊住話家人聯絡唔到，亦有人急切咁尋找留喺屋企嘅貓咪，場面極為心酸混亂。警方今日（27號）以涉嫌誤殺罪名拘捕三名工程公司嘅負責人，年齡由52至68歲。

新界北總區刑事總部高級警司鍾麗詒表示，警方發現現場外牆覆蓋嘅保護網同防水帆布，極可能唔符合本地防火標準；另外，仲喺未受波及嘅另一棟樓，竟然每層電梯大堂窗外都用咗發泡膠封住，唔排除呢啲物料係火勢迅速蔓延嘅元兇。警方強調，涉事嘅工程公司明顯疏忽，導致嚴重嘅人命傷亡。

有專家指出，近年特區政府大力推動採用中國內地嘅建材標準，令本地市場「劣幣驅逐良幣」，中國製造嘅棚網好多根本唔達標。今年10月中，香港中環華懋大廈都曾經因棚架問題發生三級火災，導致四人受傷，其中一人更加一度命危。外界因此高度懷疑，低成本嘅建築材料好可能係接連幾次火災嘅元兇，詳細起火原因仍需調查。

不過，被認為有官方新華社背景嘅微信公眾號《牛彈琴》，就將矛頭指向香港本地。《牛彈琴》今日（11月27日）發文提到，原本以為香港嘅治理能力，加上過往建築安全嘅良好紀錄，唔會演變成今次呢種重大災難，而家竟然成為數十年來最慘烈嘅一場火災，直言「這次香港讓人失望了」。

帖文又提及，消防員已經盡咗全力救火，甚至犧牲自己嘅性命，但火勢依然失控，無諗過香港仲會發生咁嚴重嘅安全事故。文中更特別指出，火勢一發不可收拾同竹棚嘅易燃性有關，內地早已轉用金屬棚架。至於有消息指工人喺竹棚內吸煙，文章就認為顯示安全管理上存在重大漏洞。