皇家海軍供精銳特種部隊使用嘅K3 Scout無人偵察艇，艇上監控鏡頭被發現含有中國製組件，一直秘密向中國境內一個裝置傳送數據，國防部發現漏洞後，被迫切斷鏡頭所有互聯網連接。事件正值倫敦擬派兵保障霍爾木茲海峽航行自由之際，令英軍供應鏈安全問題再度惹起關注。

報道指，有關傳輸屬所謂「心跳通訊」，即自動確認裝置正常連線同運作嘅訊號，係國防部進行例行網絡安全漏洞評估期間揭發。呢批無人艇由英國防務承辦商Kraken Technology Group喺漢普郡法勒姆製造，隸屬海軍「蜂巢計劃」（Project Beehive），合約總值約1,230萬英鎊（以1英鎊兌約10.4港元計，折合約1.28億港元），共20艘，自今年3月起交由海岸部隊中隊同皇家海軍陸戰隊第47突擊隊操作。艇長8.4米，可攜帶600公斤有效載荷、連續執勤30日，最高航速約55節，美國特種作戰司令部亦有採購，並曾參與北約喺波羅的海嘅演習。涉事鏡頭由第三方供應商提供，事前曾作安全保證，更聲稱符合美國《國防授權法》對中國監控設備嘅限制，結果仍被驗出內藏中國產零件，反映單靠合規標籤，未必杜絕到供應鏈風險。

國防部發言人強調，經徹底調查後，並無證據顯示國防部數據或系統曾被存取、入侵或向外傳輸；Kraken亦表示已同海軍完成全面審計，有信心無敏感資料經非預期渠道外洩，相關漏洞已經修補。不過《每日電訊報》引述國防消息人士直言，事件係查核零件來源嘅重大失誤，軍方已對呢個平台失去信心。報道又指，無人艇曾喺多塞特郡普爾嘅特種舟艇部隊（Special Boat Service）總部附近活動，據報部分鏡頭喺艇隻關機後仍然運作，令外界憂慮特種部隊人員身份同行蹤或已外洩。保守黨要求政府緊急審查軍備有冇暗藏中國組件，影子內政事務大臣凱恩斯（Alicia Kearns）更批評政府未有正視近在眼前嘅安全威脅。

呢批無人艇原本係倫敦保障霍爾木茲海峽航行自由計劃嘅一環，有消息指軍方曾用涉事平台進行相關任務規劃。受美伊衝突影響，海峽目前對商船實際封閉，通行量遠低於正常水平，伊朗同阿曼正就設立指定航道談判；和平時期每日約有2,000萬桶石油經此運輸，佔全球海運石油貿易約四分之一。事件亦令工黨政府嘅對華取態再受質疑：軍情五處（MI5）去年先至警告過中國情報機關試圖干預國會運作，政府較早前批准中國喺倫敦皇家鑄幣廠舊址興建新使館已掀起爭議，而早喺2020年，英國已經以安全理由，禁止華為參與5G網絡建設。