日本首相高市早苗傍晚喺東京首相官邸召開記者會，總結上周六（25日）閉幕嘅第221屆特別國會。被問到11月喺深圳舉行嘅亞太經合組織（APEC）峰會期間會唔會同中國國家主席習近平會面時，佢表明中國係重要嘅鄰國，又話自己「期待」出席峰會，被視為喺日中關係僵持大半年之後，再一次向北京釋出對話信號。

高市強調，佢就任首相以嚟一直堅持全面推進日中戰略互惠關係、構建具建設性同穩定嘅雙邊關係方針；正因為兩國之間存在關切同問題，更需要喺各個層面、透過唔同機會展開對話、增進相互理解，日方今後會繼續同中方保持溝通，冷靜、妥善噉應對。不過佢並無透露雙方有冇就「習高會」作出具體安排。

日中關係自去年11月高市喺國會稱「台灣有事」可能構成日本「存亡危機事態」後急轉直下，北京先後呼籲公民避免赴日、暫停進口日本水產品，再收緊稀土等軍民兩用物項對日出口管制；上月G7峰會，高市更點名批評中方措施衝擊供應鏈。今年係中國第三次主辦APEC，領導人非正式會議定於11月18至19日喺深圳舉行；高市同習近平至今只喺去年10月底韓國慶州APEC期間會談過一次，歷時約半個鐘。中央社引述新加坡《聯合早報》報道，有中國學者認為日本若唔調整對華政策，習近平屆時未必會同高市正面接觸；連早前東盟外長會議期間，日本外相茂木敏充同中國外長王毅有冇會面，雙方講法都各執一詞。

對於7月各大民調顯示內閣支持率全線下滑，時事通信調查跌至49%，係高市上台以嚟首次跌穿五成，日經同讀賣新聞分別勁跌10點同12點，高市表明暫時唔會評論數字同原因，話唔會因數字患得患失，會以謙虛、真誠嘅態度為國家同國民腳踏實地做事。有日媒分析指，政府喺國會後段強行通過「副首都」設置法案等爭議立法，可能係支持率急插嘅原因之一。

談到物價對策，高市話包括補充預算在內嘅措施正在執行，成效會逐步惠及國民，並聲稱日本喺七國集團（G7）之中通脹率最低、實質工資增幅最高。

高市今年2月8日大選帶領自民黨歷史性大勝、單獨奪得316席，創單一政黨史上最多議席紀錄，並於2月18日再度獲指名為首相。佢話今屆國會秉持切實兌現眾議院選舉承諾嘅信念，政府提交嘅全部64項法案悉數通過，係戰後第四次，當中包括寫入自民黨同日本維新會聯合執政協議、1947年施行以嚟首次實質修改嘅《皇室典範》修正案，容許女性皇族婚後保留皇籍、舊宮家男系男子過繼入皇室；仲有設立「國家情報局」嘅法律，呢個負責強化對外情報功能、防範外國不當干預嘅新機關，將於本周五正式運作。高市強調國會閉幕後兌現承諾嘅步伐唔會停低，反而要加快，決心絕不動搖。