過去兩年席捲全球嘅人工智能（AI）狂熱，喺美國民間正遭遇前所未有嘅強烈反彈。最新多項民意調查顯示，超過七成美國民眾認為 AI 發展速度「過快」，對科技巨頭嘅傲慢感到厭倦。呢股民怨已經由網絡口水戰，演變成實質嘅經濟阻力同埋暴力衝突：今年第一季全美多個數據中心計劃因居民抗議而胎死腹中；早前更有人向 OpenAI 行政總裁奧特曼（Sam Altman）嘅寓所投擲汽油彈，反映美國社會對 AI 侵蝕生計、掠奪資源嘅焦慮感已經到咗臨界點。

根據《經濟學人》與 YouGov 喺2026年5月中發表嘅聯合民調，高達 70% 嘅美國受訪者明確表示 AI 發展得太快。值得留意嘅係，呢種焦慮感打破咗美國近年嚴重嘅政治對立，無論係民主黨定共和黨嘅支持者，喺「反AI」呢點上都展現出罕見嘅共識。

更令科技界震驚嘅係，以往最擁抱新科技嘅年輕世代亦開始轉軚。Gallup針對 14 至 29 歲年輕人嘅調查發現，竟然得返 18% 嘅人對 AI 未來持樂觀態度。大部分受訪者直言，AI 冇令生活變得更美好，反而帶來「飯碗不保」嘅實質威脅。大眾嘅負面情緒，目前已經直接重創 AI 發展嘅核心命脈——數據中心。AI 模型需要龐大嘅算力，而算力背後係驚人嘅電力消耗同埋環境成本。

根據 Heatmap Pro 嘅統計數據，2026 年第一季全美遭到取消或叫停嘅數據中心項目數量創下歷史新高。喺緬因州同加州等多個地區，地方社區居民組織起嚟，抗議數據中心推高本地電費、耗盡水資源，並加劇碳排放。投資機構摩根士丹利（Morgan Stanley）警告，公眾嘅強烈反彈已經令投資者卻步，AI 泡沫面臨「算力斷頭」嘅危機。

事實上，美國民間對 AI 嘅抵抗由來已久。從荷里活編劇與演員工會（WGA、SAG-AFTRA）持續對 AI 生成劇本同「數碼替身」進行談判抗爭，到超過 8500 名作家聯名譴責 AI 公司非法使用版權作品，文創界嘅怒火從未平息。今年初，全美多地更爆發針對 AI 生成藝術嘅激進抗議。喺一場 AI 藝術展上，有美國學生因不滿主辦方用版權圖片訓練模型，當場扯落並「食落肚」57 張作品以示抗議，最終被警方拘捕。

然而，更極端嘅事件喺矽谷上演。今年初，一名男子向 OpenAI 行政總裁奧特曼嘅住寓投擲汽油彈，隨後更企圖前往 OpenAI 總部縱火及行刺員工。該名男子落網後聲稱要「阻止 AI 寡頭竊取人類未來」。令人不寒而慄嘅係，呢宗恐怖襲擊網絡新聞下方，竟然獲得數以千計嘅網民點讚支持，顯露出民間對科技新貴嘅仇恨值已經爆燈。

除咗外部反彈，科技界內部亦出現「反噬」現象。隨着 Google、微軟及 Meta 宣稱內部有高達七成至九成嘅程式碼由 AI 生成，矽谷工程師正遭遇核心技能退化嘅危機。

Anthropic 最新研究指出，過度依賴 AI 輔助工具，導致年輕一代程式設計師嘅除錯（Debugging）能力大幅下降，專業判斷力萎縮。企業高層一味追求「降本增效」，可能削弱緊人類科技進步嘅基石。

民間普遍認為，目前的 AI 技術並非為公眾福祉服務，而係科技巨頭掠奪社會財富、加劇貧富差距嘅工具。呢場席捲全美嘅反 AI 浪潮，正向矽谷發出最強烈嘅警號：科技如果失去人類嘅信任，最終只會走向反烏托邦嘅崩壞結局。