俄烏戰爭喺俄羅斯勝利日前夕，再次出現一種極度矛盾嘅局面：雙方口頭上都講停火，但軍事上就趕喺儀式日前互相施壓。俄羅斯總統普京宣布，俄方會喺5月8日至9日勝利日紀念期間實施單方面停火；烏克蘭總統澤連斯基就反建議，由5月6日開始即時實施長期停火。不過，停火語言未落地，導彈同無人機已經先落地。

據路透社5月6日報道，澤連斯基指控俄羅斯無視基輔提出嘅停火建議，喺烏方建議停火後仍然發動大量戰場攻擊、空襲同無人機襲擊。報道指，普京提出嘅停火期係配合俄羅斯二戰勝利日紀念活動；澤連斯基則回應稱，烏克蘭願意由5月6日開始停火，目的係追求真正和平，而唔係只為配合莫斯科閱兵。澤連斯基表示，截至當地星期三上午，俄方已經出現1,820宗違反停火情況，形容莫斯科係明顯拒絕停火同拯救生命。

戰場實際情況更加殘酷。半島電視台引述烏克蘭官員同路透社報道指，俄羅斯喺停火前夕發動導彈同無人機攻擊，造成至少27人死亡。烏克蘭東南部扎波羅熱一個汽車維修場同住宅區遭滑翔炸彈擊中，單一襲擊已造成最少12人死亡，另外20人受傷；克拉馬托爾斯克有6人死亡，第聶伯羅亦有4人死亡。

烏克蘭國營能源公司Naftogaz亦成為今輪打擊目標。Naftogaz公布，俄軍喺5月4日至5日夜間大規模攻擊其位於波爾塔瓦同哈爾科夫地區嘅天然氣生產設施，使用無人機同彈道導彈混合攻擊，造成重大損毀同生產損失。公司行政總裁科雷茨基表示，3名Naftogaz員工同2名國家緊急服務局救援人員死亡，另有37人受傷。

CNN報道就進一步引述烏克蘭內政部長克利緬科及烏克蘭空軍數據指，俄羅斯喺停火前24小時內使用11枚彈道導彈同154架無人機攻擊烏克蘭，造成至少27人死亡、超過120人受傷。報道提到，波爾塔瓦天然氣設施遭雙重打擊，救援人員抵達後再受第二輪攻擊，造成5死37傷。

但烏克蘭亦唔係只守不攻。喺俄軍密集轟炸烏克蘭之際，烏方同時將戰火推入俄羅斯腹地。據《莫斯科時報》報道，俄羅斯楚瓦什共和國地方官員確認，當地5月5日遭烏克蘭無人機攻擊，造成2人死亡、數十人受傷；楚瓦什共和國首長尼古拉耶夫其後宣布全區進入緊急狀態。報道又指，首府切博克薩雷超過20幢住宅樓受損，32人受傷。

CNN亦報道，烏克蘭今次對楚瓦什地區發動罕見長程導彈及無人機攻擊，距離烏俄邊境超過600英里，造成2人死亡、34人受傷，當中包括一名兒童。澤連斯基表示，襲擊目標包括楚瓦什地區嘅軍工複合體設施，並形容烏克蘭嘅長程打擊係對俄羅斯攻擊嘅合理回應。

今次所謂停火，實際上更似一場「停火打架式推進」。俄羅斯一方面宣布5月8日至9日停火，另一方面喺停火前夕加強轟炸烏克蘭城市、能源設施同工業區；烏克蘭一方面提出即時長期停火，另一方面用遠程導彈同無人機深穿俄羅斯腹地，打到距離邊境超過600英里嘅楚瓦什。雙方都用停火語言爭取外交位置，但軍事上就趕喺勝利日之前盡量令對方窒息。

俄羅斯勝利日閱兵本身，亦已經由政治儀式變成軍事壓力測試。路透社報道指，俄羅斯將舉行縮水版勝利日閱兵，並因應烏克蘭攻擊威脅加強保安；俄羅斯國防部早前警告，如果烏克蘭試圖破壞勝利日紀念活動，俄方會向基輔市中心發動大規模導彈報復。 CNN亦指，由於廉價無人機喺戰爭中大量出現，莫斯科勝利日閱兵已因安全憂慮縮減重型武器展示，當地電訊商同銀行亦提醒市民，本星期可能出現流動網絡同短訊限制。

呢種局面反映俄烏雙方嘅核心矛盾：停火唔再單純係軍事安排，而係一種政治姿態。普京需要勝利日嘅秩序同象徵，維持俄羅斯戰爭敘事；澤連斯基則要證明，烏克蘭唔會配合莫斯科將停火變成閱兵工具。因此，雙方各自提出停火方案，但都唔願意喺實際戰場上先讓一步。

對俄羅斯嚟講，停火窗口可以用嚟保護紅場閱兵，同時向外界展示自己仍然掌握戰爭節奏。但問題係，如果俄軍喺停火前繼續大規模攻擊烏克蘭平民同能源設施，俄方嘅停火就好難被視為真正和平建議。對烏克蘭嚟講，提出長期停火可以爭取國際輿論，但用長程火力打入俄羅斯腹地，亦係向莫斯科表明：如果俄羅斯想用勝利日建立安全泡泡，烏克蘭有能力將戰爭帶返俄羅斯本土。