日本京都府南丹市發生一宗轟動全國嘅倫常慘案。失蹤超過三星期嘅11歲男童安達結希，遺體早前喺山區被發現，更出現「白骨化」跡象。京都府警方經過連日調查，今日（16日）凌晨正式拘捕男童嘅37歲繼父安達優季，指佢涉嫌棄屍。據悉，疑犯喺偵訊期間已經供認不諱，仲冷淡交代：「係我做嘅。」

呢單悲劇要由今年3月23日講起。當日係南丹市立園部小學嘅畢業典禮，亦係原本11歲男童安達結希同屋企人約好去台灣旅行嘅前一日。

據報，當日朝早8點，繼父聲稱親自開車送男童去學校附近落車，但校方喺中午發現男童一直冇返到學，通知家長後，繼父於當日中午報警求助。當時外界仲以為係一宗普通嘅兒童失蹤案，警方甚至動員過千人次喺附近搜山，點知隨後發現嘅證據，令案情越嚟越唔對路。

喺搜尋期間，警方先後喺唔同地點搵到男童嘅遺物，但呢啲發現反而令案件變得更加離奇：

．監視器冇影到人： 繼父聲稱喺學校附近放低男童，但警方翻查附近所有天眼片段，完全見唔到男童嘅身影。

．書包「瞬間移位」： 3月29日，有人喺離學校3公里外嘅山區搵到男童嘅黃色書包。奇怪嘅係，嗰個位警方之前已經搜過三次，次次都話「乜都冇」，點知第四次就突然出現，懷疑有人事後先至「補位」棄置。

．赤腳遺體： 4月13日，警方終於喺一處偏僻山林發現男童遺體。遺體當時雖然著住衫褲同襪，但就冇咗對波鞋。而嗰對黑色波鞋，竟然係喺另一個相隔5公里嘅地方被搵到。

隨住遺體被尋獲，案件由「失蹤案」升格為「他殺案」。死狀慘不忍睹，據現場消息指，遺體已經部分白骨化，反映男童可能喺失蹤後無耐就已經遇害。

當地老街坊表示，發現遺體嘅地點非常隱蔽，「得本地農民先會行」，甚至連附近養嘅狗都冇吠過，懷疑係熟悉地形嘅人喺深夜棄屍。警方將調查矛頭指向報案嘅繼父。

4月15日，警方大舉搜查男童住所，並帶走繼父問話。喺鐵證面前，呢位37歲男人終於崩潰，承認自己殺害繼子並棄屍荒野。雖然目前死因仲未正式確定，但疑犯已經被控以「遺棄屍體罪」，不排除之後會加控謀殺罪名。

據鄰居透露，男童係媽媽同前夫所生。媽媽後來喺工廠認識現任丈夫（即疑犯），兩人重組家庭，原本一家三口同住。鄰居眼中，呢家人平日出入並無異樣，點知竟然藏住咁深嘅殺機。

「明明聽日就去旅行，點解要咁殘忍？」唔少日本網民對事件感到憤怒同心痛。目前警方正全力調查疑犯嘅殺人動機，以及男童遇害嘅確實經過，試圖還呢位11歲男童一個公道。