隨住第 11 個「全民國家安全教育日」（4月15日）臨近，教育部同中央相關部門正式宣佈，針對全國中小學生編寫嘅《國家安全教育中小學生讀本》已經正式出版並發行。呢套讀本被官方定位為「權威用書」，要求各地學校全面配合使用，務求將「總體國家安全觀」由小學開始紮根，一路「貫通」到大學。

據央視新聞報道，呢套新出版嘅讀本一共分為四冊，涵蓋咗小學（上、下冊）、初中同高中三個階段。官方指，讀本嘅設計係根據唔同年齡層學生嘅認知能力，採取「循序漸進」嘅方式進行教學：

• 小學階段： 上冊主要係介紹國家安全嘅基本常識，目標係令細路仔覺得自己生活喺一個安全嘅國家，並理解呢種安全係「喺黨嘅領導下」各行各業努力嘅成果；下冊就透過案例故事，教學生點樣提高安全意識。

• 初中階段： 重點轉向「總體國家安全觀」，引導學生形成各個領域安全嘅基本認識，並初步建立「國家利益至上」嘅觀念。

• 高中階段： 內容更為深入，環繞住「十個堅持」展開，強調國家安全對國家發展嘅重要性，要求學生建立「大安全」觀念，堅定維護國家安全嘅決心。

教育部負責人強調，呢套讀本會同現有嘅大學生讀本接軌，實現由小學到大學嘅教育全覆蓋。教育部明確要求，各地學校要將呢套《國家安全教育中小學生讀本》，同之前已經推行嘅《習近平新時代中國特色社會主義思想學生讀本》以及思想政治課教材配套使用。官方強調，呢次推行讀本係要推動國安教育喺中小學「落實到位」，唔可以只係搞形式主義。

事實上，呢種教育趨勢近年亦都深深影響緊香港。根據特區政府教育局最新發布嘅通函，香港各中小學喺聽日（15 日）亦會舉行一連串活動，包括升旗禮、奏唱國歌以及「國旗下的講話」。唔少學校更將國安教育滲透入各個學科，由中文、歷史到地理，甚至連數學科教「仰角」都會引用解放軍嘅例子作為教材。

雖然官方強調國安教育係要培養學生嘅國民身份認同，但基層教育界亦有唔同嘅聲。有上海嘅家長反映，現時學生嘅課業負擔已經好重，教育部雖然口頭上話要減負、嚴禁幼兒園小學化，但同時又不斷加入新嘅專題讀本，令學生同老師都感到壓力。

另外，校園內嘅「圖書審查」亦成為常態。有報導指，香港部分官立小學喺過去一年進行咗多次大規模圖書檢視，發現有部分社會科學同史地類書籍涉及「敏感字句」，需要即時下架。呢種氛圍令到部分教職員喺挑選課外閱讀材料時變得更加謹慎，甚至出現「寧改錯，莫放過」嘅心態。

隨住呢套中小學讀本嘅面世，標誌住中國國安教育正式進入「制度化」同「常態化」嘅新階段。由最初嘅專題講座、安全演習，到而家有埋統一嘅教材同考核機制，官方正透過全方位嘅手段，試圖轉移焦點，逃避經濟同民間情緒日趨緊張嘅困境。