今朝中國國民黨主席鄭麗文同志率領「2026和平之旅」訪問團，喺朝早11點抵達人民大會堂東大廳，同國家主席、中央總書記、中央軍委主席習近平同志會面。呢次係繼2016年之後，時隔成10年，國共兩黨領導人再次「坐低慢慢傾」，意義非同小可。

鄭麗文今日特登著咗一套象徵國民黨嘅寶藍色套裝出席會面。兩人一見面就大方握手畀傳媒影相，呢一握就足足握咗14秒。習近平喺開場白嗰陣表現得相當客氣，佢形容兩岸同胞都係中華民族一份子，「冇咩力量可以將我哋分開」，仲強調兩岸應該要「行埋一齊」。

習近平特別提到，兩岸關係雖然經歷過唔少風浪，但「根在大陸、魂繫中華」呢點係抹唔走嘅。佢強調只要大家認同「九二共識」同埋反對台獨，兩岸之間就乜都可以傾。

輪到鄭麗文發言時，佢語氣堅定，直言而家係一個「痛定思痛、重建和平」嘅時代。佢話台灣人唔希望見到台海變成外力介入嘅「棋盤」，更加唔想變成潛在嘅衝突點。佢提出兩岸應該要建立一套「制度化」嘅對話機制，令到和平發展可以變成「不可逆轉」嘅趨勢。

鄭麗文話：「和平係兩岸共同嘅道德底線。」佢呼籲雙方要超越政治對抗，用智慧去解決紛爭。席間，佢仲特別提到上海嘅繁榮，話只要畀和平足夠嘅時間，「一切都有可能」。

值得留意嘅係，呢次會面地點揀喺人民大會堂嘅「東大廳」，而唔係過往常見嘅「福建廳」或者「台灣廳」。有熟悉兩岸事務嘅專家分析，東大廳通常係習近平接見外國元首嘅地方，今次咁安排，反映出北京方面畀咗鄭麗文「超規格」嘅禮遇，將佢視為重要客賓對待。

不過，就喺鄭麗文喺北京大談和平之際，台灣後方卻傳出「火藥味」。鄭麗文嘅丈夫駱武昌被爆出喺威權時代疑似做過「校園運用人員」，監控異議學生。雖然呢件事同「鄭習會」無直接關係，但已經喺台灣政壇掀起大波。綠營唔少人趁機抽水，質疑鄭麗文一家嘅政治立場。

其實國民黨今次搞呢鋪都唔出奇，歷史上國共兩黨從來都係分分合合、糾纏不清，因為兩黨根本「系出同源」。中華民國13年（1924年），蘇聯遣顧問越飛（Adolf Abramovich Ioffe）至中國教孫文改組中國國民黨，改造國民黨成為「蘇式政黨」，並允許共產黨員以個人身分加入國民黨。而國民黨引以為豪嘅「黃埔軍校」，其顧問同樣係蘇聯軍官，幾多共產黨名將甚至開國元勳亦出自黃埔，而黃埔軍校旨在生產「列寧式黨軍」。喺當時國際承認嘅合法政權北洋政府眼中，國共兩黨都係「恐怖份子」，冇乜區別。