在第十一個「全民國家安全教育日」來臨之際，位於福建福州螺洲鎮嘅吳石故居，正式獲國家安全部命名為「全國國家安全教育基地」。授牌儀式喺2026年 4 月 9 日舉行，標誌住呢座見證「密使一號」傳奇一生嘅百年古厝，正式成為推廣國家安全意識、傳承紅色基因嘅重要課堂。

呢座佔地約 946 平方米（約一萬多平方呎）嘅清代合院式建築，係吳石將軍出生、成長同埋早期革命思想萌發嘅地方。故居內設有名為「憑將一掬丹心在——吳石烈士生平事跡展」嘅長期展覽，透過「兩進兩廊」嘅傳統建築佈局，向公眾展示咗吳石由北伐少年到「抗日儒將」，再到最後潛伏台灣、壯烈犧牲嘅傳奇歷程。

舊年熱播嘅電視劇《沉默的榮耀》將吳石將軍嘅事跡帶入咗大眾視野。由實力派演員于和偉飾演嘅吳石，將將軍喺危難中嘅堅韌同對故鄉嘅眷戀演繹得入木三分。

吳石（1894-1950），原籍福建閩縣，曾任國民政府國防部參謀次長，係 1950年代中共潛伏台灣最高級別嘅情報官員，代號「密使一號」。佢喺台灣期間，先後將《台灣戰區戰略防禦圖》、海防前線陣地部署等重要軍事機密傳回大陸，為解放戰爭嘅情報工作立下奇功。1950年，因受蔡孝乾案牽連，吳石身分曝光，最終喺台北馬場町刑場被處死，時年 56 歲。

據了解，今次吳石故居係國家安全部命名嘅第 25 個「全國國家安全教育基地」，亦係福建省繼龍岩之後嘅第二個。國家安全部相關負責人喺授牌儀式上表示，吳石烈士嘅故事係「隱蔽戰線」嘅典範，將故居列為教育基地，目的係要讓公眾喺「歷史與現實嘅對話」中，深刻體會到維護國家安全嘅重要性。

現場所見，故居經過修繕後，保留咗傳統木結構院落嘅韻味。吳石嘅後人、姪孫吳行先生目前依然住喺老宅入面，守護住家族嘅記憶。故居入面展示咗吳石生前熱愛嘅福州土特產文化，以及佢旅日期間將寓所命名為「榕廬」以寄託鄉愁嘅書信，展現出英雄人物有血有肉嘅一面。

吳石將軍雖早早「殉國」，未能光榮回歸「新中國」，但以之後嘅歷史脈絡嚟睇，佢好大機會會喺反右運動甚至文革等政治運動中被「打倒」。一係被「鬥臭」晚節不保、結局淒涼，唔知等唔等到黨為佢平反；一係直接被批鬥致死。早啲死反而永遠定格喺「烈士」身份，上天畀咗佢最體面嘅結局，吳石將軍其實幾好命。