巴基斯坦消息人士透露，該國已制定一份結束敵對行動嘅框架方案，並連夜同伊朗同美國進行溝通，目標係達成一份喺4月6日就能夠立刻生效嘅臨時停火協議，主要目的就係重開霍爾木茲海峽。美國總統特朗普則喺日前再次發出嚴厲警告，如果伊朗喺4月7日晚間之前再唔重開海峽，美國就會摧毀伊朗境內所有橋樑同發電廠。佢更喺自家社交平台 Truth Social 爆粗發出最後通牒：「星期二將會係伊朗嘅『發電廠』兼『大橋』記念日，一次過收佢檔。呢鋪同佢玩大佢！！！同我開返嗰個死XX海峽，你哋呢班痴線佬，如果唔係你哋就準備喺煉獄度生活，放長雙眼睇！讚美真主。」

呢個由巴基斯坦主導嘅停火框架，分兩個階段實施：首先係立即停火、即時重開霍爾木茲海峽，之後再用15至20日時間達成全面協議，當中包括伊朗承諾限制核計畫、美國解除對伊朗嘅制裁。知情人士話，框架方案嘅「所有要素都必須達成一致」，初步共識會以「諒解備忘錄」形式落實，由巴基斯坦負責最終敲定文本，並擔當呢輪談判中唯一嘅溝通管道。所有談判到而家都係透過電訊方式進行，最終面對面會談預計會喺巴基斯坦首都伊斯蘭瑪巴德舉行。

美國、以色列同地區消息人士話，美國同伊朗正透過地區調停者探討一份可能為期45日嘅停火協議，作為最終結束戰爭嘅兩階段和平條約一部分而參與遠程磋商嘅包括巴基斯坦陸軍參謀長穆尼爾元帥（Asim Munir）、美國副總統萬斯、美國總統特使威特科夫（Steve Witkoff）同伊朗外長阿拉格齊（Abbas Araqchi）。不過美國同伊朗官方到而家都未有即時回應，巴基斯坦外交部亦拒絕置評。

伊朗官員之前已經表示，德黑蘭尋求永久停火，並要求美國同以色列唔再攻擊伊朗。他哋話，伊朗已收到包括巴基斯坦、土耳其同埃及在內調停方嘅訊息。面對特朗普喺社交平台上「發電廠日」同「大橋日」嘅瘋狂威脅，伊朗議會議長卡利巴夫（Mohammad Bagher Qalibaf）喺週日亦喺社交媒體發文，駁斥特朗普近期威脅要打擊伊朗基礎設施嘅言論，形容其「魯莽」。卡利巴夫話：「你唔會從戰爭罪行中得到任何好處……唯一真正嘅解決辦法係尊重伊朗人民嘅權利，結束呢場危險嘅遊戲。」

伊朗國家電視台報道，伊朗最高聯合軍事指揮部警告，如果美國同以色列襲擊該地區石油同民用基礎設施，伊朗亦會加大對呢類設施嘅攻擊力道。更有消息傳出，伊朗將聯合「抵抗陣線」，封鎖範圍擴大到紅海沿岸嘅曼德海峽。全球約12%嘅貿易通常經由呢個海峽進行，一旦封鎖，全球能源同貿易流通將受到嚴重影響。

特朗普嘅最新最後通牒，係喺上個月限令伊朗達成協議同開放霍爾木茲海峽之後，再次收緊時間表。原本10日期限已經過去，但最近一次受訪時，他又將期限改到週二（4月7日），之後喺週日下午除咗發表上述嘅「煉獄」言論外，仲未做進一步說明就發文強調：「週二，美東時間晚上8:00！」。

巴基斯坦呢次調停努力，係目前為止最接近打破僵局嘅一步。如果今日能達成初步共識，霍爾木茲海峽有望即時重開，全球油價或會回落，但特朗普嘅威脅同伊朗嘅強硬立場，仍然令局勢充滿變數。國際社會正屏息以待，呢場中東危機會否喺今日迎來轉機，還是會進一步升級，一切有待巴基斯坦、美國同伊朗下一步嘅回應。