美國與以色列對伊朗發動軍事行動已經超過一個月，美國總統特朗普於美東時間4月1日晚上9時（本港時間4月2日上午9時）發表全國講話，指美國將會喺未來兩至三星期內對伊朗展開更猛烈打擊，直言「要將佢哋打回石器時代，送返去佢哋應該去嘅地方」。

市場原先預期戰事有機會走向「休戰」，但特朗普言論明確轉向升級衝突，令市場即時出現恐慌情緒。布倫特原油CFD急升約6%至106美元，倫敦金價則由高位急挫逾150美元，由每盎司4800美元跌至4649美元，按前一日收市計下跌接近1.7%；美國三大指數期貨亦全面轉跌。亞洲市場同步受壓，台股由升323點倒跌超過300點，日股下挫接近1200點，韓股跌幅約4%，港股跌幅一度擴大至超過200點，下試25000點關口。

特朗普指出，今次代號為「史詩狂怒」（Epic Fury）嘅軍事行動，以及早前喺2025年6月展開嘅「午夜之錘」（Midnight Hammer），已經重創伊朗核設施。對於近期能源價格上升引起民眾憂慮，佢形容只屬短期現象，並將原因歸咎於伊朗對中東能源設施發動攻擊。

佢同時提及，對伊朗嘅軍事行動並非為石油利益，強調美國已經實現能源獨立，現時亦無需要從中東進口能源，未來亦唔會依賴該區資源。對於因霍爾木茲海峽封鎖而面臨能源短缺嘅國家，特朗普建議可以轉向進口美國能源，亦可以主動參與解封行動。

特朗普威脅，如果伊朗拒絕同美國達成協議，美方將進一步襲擊伊朗發電廠，並表示伊朗雷達系統已經被完全摧毀，現時已接近完成所有戰略目標，甚至聲稱伊朗政權更迭已經完成。又指美軍已經「竭盡全力」，聲稱伊朗海軍已經覆滅，空軍亦不復存在，導彈系統被摧毀或者被擊落，整體軍力已受到重大削弱，並指行動已經粉碎伊朗支援代理人勢力嘅能力，同時削弱其製造核武能力，並稱美軍表現「卓越」。

特朗普指今次對伊朗嘅軍事行動只用咗32日，遠短過美國歷來主要戰事，包括第一次世界大戰歷時1年7個月5日、第二次世界大戰3年8個月25日、韓戰3年1個月2日、越戰19年5個月29日，以及伊拉克戰爭8年8個月28日。

喺講話中，特朗普再次批評奧巴馬政府於2015年同伊朗達成嘅核協議，形容為「災難」，認為該協議向伊朗提供大量資金，並表示慶幸自己上任後已經終止相關安排，「否則就唔會有中東同以色列」，又稱「等成件事完咗之後，美國會比以前任何時候都更加安全、更強大、更繁榮，亦都更加偉大。」