全球能源供應鏈，因美以伊朗嘅戰爭遭受重創，中國作為亞太地區最大嘅航空燃油同煤油出口國，最近幾週大幅削減出口，令澳洲同日本等國正面臨嚴重供應短缺，正四處尋找替代供應商應急。根據貿易數據供應商Kpler嘅最新數字，中國三月份航空燃油出口較上個月急跌近四成，只剩每日二十萬四千桶，呢個急劇下跌主要係因為中東戰事爆發後，中國政府由三月十二日起下令煉油廠停止出口柴油、汽油同航空燃油，目的是保障本土供應穩定。

因伊朗封鎖霍爾木茲海峽，全球大約兩成石油運輸受阻，導致油價同燃油價格急升，亞洲地區燃料供應本已緊張，中國呢一輪出口禁令更加雪上加霜。澳洲同日本係中國航空燃油最大買家之一，兩國高度依賴中國供應，Kpler分析指，呢次削減對佢哋影響最大。澳洲去年大約有三分一嘅航空燃油嚟自中國，相當於每年數十億公升；日本亦係重要買家，戰事爆發後已通知航空公司可能要面對加油限制。澳洲能源部長鮑文（Chris Bowen）上週表示，中國供應至少維持到四月底或五月初，但最新船運數據顯示，四月份已經冇中國航空燃油貨船駛往澳洲，澳洲正緊急轉向美國同歐洲尋找替代貨源，部分已取消或延遲嘅亞洲貨運，正被長途運輸取代。

呢個供應危機唔止影響澳洲同日本，越南、馬來西亞、菲律賓、新加坡、南韓、加拿大同美國都受到波及。菲律賓總統小馬可斯（Ferdinand Marcos Jr.）已宣布全國能源緊急狀態，警告飛機停飛係「絕對有可能」；南韓航空公司亦向政府求助，將部分出口航空燃油轉回本土市場。澳洲航空燃料儲備大約夠用二十九至三十日，政府雖然話目前無即時短缺，但業界擔心，如果禁令延長，東岸機場如悉尼同墨爾本可能出現航班取消或延誤，旅客票價勢必急升。澳洲每年消耗大約一百億公升航空燃油，其中八成依賴進口，中國同南韓供應一旦出事，等於四億公升燃料來源受威脅。

中國政府未有公開宣布禁令，但據業內消息人士透露，禁令將延長至四月份，只會對東南亞國家提供小量豁免，討論中嘅出口量可能只係十五萬至三十萬噸，遠遠唔夠填補缺口。Kpler分析師指出，中國一向係亞洲燃料市場嘅「搖擺供應商」，今年出口總值超過二百二十億美元，一旦大幅減少，其他亞洲出口國如印度同日本嘅煉油廠亦無力完全取代，亞洲航空燃油價格已由戰前每桶九十二美元左右，急升至一百六十三美元，升幅超過七成。呢個價格衝擊唔單止推高航空公司營運成本，更可能傳導至旅客票價同物流費用，最終影響經濟活動。

日本方面，雖然未有公開詳細數據，但業界已預期航空公司要面對加油限制，部分國際航班可能調整航線或減少班次。香港作為亞太航空樞紐，雖然未有直接依賴中國航空燃油，但全球供應鏈連動效應下，區內航班網絡一旦收縮，經香港轉機嘅旅客同貨運亦可能受波及。航空業分析指，如果危機持續，亞洲航空旅行需求或會出現「需求破壞」，部分廉價航空已開始取消長途航班，旅客要預備更高票價同更少選擇。

澳洲政府正加快多元化供應來源，包括增加本土煉油能力同加強同美國嘅能源合作；日本亦在考慮增加儲備同尋求中東以外供應。中國煉油廠目前優先保障國內需求，部分海南保稅區嘅少量出口仍在清關，但整體出口量已大幅收窄。呢次危機帶出左亞太地區對中東能源依賴嘅脆弱性，同時反映地緣政治衝突係點樣迅速波及全球民航業。