美國國務卿盧比奧表示，華府已經開始見到進入第五週嘅伊朗戰爭終點線，並預告戰後將重新檢視同北約之間嘅關係。喺32個北約成員國之中，只有6個國家公開支持美國同以色列對伊朗嘅軍事行動，包括加拿大、捷克、阿爾巴尼亞、北馬其頓、立陶宛同拉脫維亞。

盧比奧喺霍士新聞頻道（FOX NEWS)節目入面表示，美國已經可以見到戰爭終點線，雖然唔係即日，但戰局正逐步向結束方向推進。盧比奧指出，美國同伊朗之間正透過間接渠道進行訊息往來，雙方已經有持續對話，未來存在喺某個時間點展開直接會談嘅可能性。

美國總統特朗普對戰爭嘅定位同目標，一直出現調整。由最初提及推翻伊朗政權，到削弱其軍事能力，再到限制區域影響力，政策方向多次轉變。特朗普最新表示，美國有可能喺兩至三星期內結束軍事行動，顯示白宮正嘗試為戰爭設定一個可控收場時間。

盧比奧指出，華府將喺戰後重新評估同北約嘅關係，並強調最終決定權屬於總統。佢認為，美國需要重新審視呢個長期對自身有利嘅聯盟，係咪仍然發揮原本作用，抑或已經變成單向關係，即美國持續為歐洲提供防衛，而當美國需要盟友支援時，部分國家卻拒絕提供軍事基地使用權，甚至唔容許美軍飛越領空。

佢進一步指出，北約之所以對美國有價值，在於可以讓美軍喺海外部署兵力同裝備；但如果歐洲喺自身安全受到威脅時期望美國介入，而喺美國需要支援時卻拒絕合作，咁樣嘅安排將難以持續，亦難以向美國國內解釋其合理性。

歐洲方面嘅態度，已經令跨大西洋關係出現明顯裂痕。西班牙首相桑切斯係唯一公開譴責戰爭嘅領導人。西班牙近日宣布，關閉與伊朗戰爭相關嘅飛行領空，並禁止美國使用位於安達盧西亞嘅美西聯合軍事基地，直接限制美軍行動空間。

法國同德國均反對戰爭升級，英國則表明唔會參與打擊行動，並呼籲各方降級衝突，同時曾限制美軍使用其境內軍事設施。北約秘書長呂特則對美國行動表示支持，但同時強調北約作為組織並無直接參戰，因為聯盟由32個成員國組成，各國立場自然存在差異。

特朗普對歐洲表現出明顯不滿。喺3月27日邁阿密一個投資論壇上，佢表示美國未必需要繼續留喺北約，並批評歐洲盟友未有提供對等支持，指出美國一直支持歐洲，但按現時情況，美國未必需要繼續承擔同樣角色，並質疑如果對方唔為美國利益著想，美國點解仍要為對方付出。