特首李家超今日宣布，中央決定任命謝小華為政制及內地事務局局長。有分析認為，前局長曾國衞係首位紀律部隊出身嘅政制局長，佢喺2020年被任命，被外界視為「武官治港」嘅一部分。而今次謝小華被任命，某程度上代表向傳統AO系統回歸。

李家超表示，政制同內地事務局嘅職責，包括貫徹《基本法》嘅落實，推廣《憲法》同《基本法》嘅認識，促進同內地嘅聯繫同合作，同埋舉辦選舉等等，而目前重中之重嘅工作，係喺行政長官主導下，主責統籌編製香港第一份五年規劃。

李家超表示，佢考慮咗唔同人選，最後決定邀請謝小華，接任政制同內地事務局局長，亦都係考慮到謝小華係退休資深政務主任，有38年政府工作經驗，表現卓越，有領導能力，具備豐富行政同管理經驗，能夠同政府上下建立良好溝通同合作關係。佢亦都認同並支持行政長官嘅施政理念，認為佢係合適同有能力履行政制同內地事務局局長嘅職責。

今年1月27日，國務院根據李家超嘅建議，免去曾國衞嘅政制及內地事務局局長職務。曾國衞當時嘅解釋係健康原因——佢話前列腺癌指數PSA值長期超過11，經過各種治療都冇改善，所以決定喺完成立法會選舉之後請辭。不過，呢個「健康理由」喺政圈引起唔少遐想。

有泌尿科專家指出，PSA值11代表患癌風險只係大約四成，而且曾國衞離任前嘅感言提到「仍然希望喺唔同崗位貢獻社會」，令人懷疑健康是否唯一嘅離職原因。HK01亦引述政界消息指，曾國衞過去屢傳與港府高層「不咬弦」，甚至與個別問責官員就選舉事宜有摩擦。

曾國衞走之後，政制局一度陷入「三無」狀態——無局長、無常任秘書長、無政治助理，由副局長胡健民署任局長。兩個月來，政圈對繼任人選傳言滿天飛：有人話維護國安委員會秘書長區志光係大熱，因為佢有警隊背景同北京信任；有人估會唔會係入境處處長郭俊峯，複製「曾國衞模式」；亦有人話今次可能會改由AO政務官出任。結果，中央揀嘅係謝小華，一個已經退休嘅資深政務官。呢個選擇有幾個值得注意嘅地方。

第一，謝小華嘅公務員資歷極之深厚。佢1987年加入政府，1988年轉職政務官系統，至今有接近38年嘅公務經驗。佢曾經喺多個核心部門服務：憲制事務科、新機場工程統籌署、經濟科、庫務局、運輸及房屋局等等。值得特別留意嘅係，佢早年曾經喺憲制事務科工作——呢個正正就係政制局嘅前身。換言之，佢對該局嘅核心業務，並非完全陌生。

第二，佢有處理複雜政治議題嘅經驗。2016年至2022年，謝小華擔任民政事務總署署長，期間經歷咗2019年區議會選舉民主派大勝、以及新冠疫情對地區工作嘅衝擊。當時佢需要應對與民主派區議員嘅持續衝突 。

第三，佢係由退休狀態被召回。謝小華喺2025年1月2日已經開始退休前休假，正式離開公務員體制。今次被任命為局長，等於從退休中「復出」。呢個做法喺香港政壇並非完全冇先例，但的確唔常見，反映出揀人過程可能並唔順利，最終需要搵一個經驗豐富但已經唔喺體制內嘅人。