美國加州洛杉磯法院於當地時間25日作出一個足以撼動整個科技界嘅歷史性裁決。一個由 12 人組成嘅陪審團一致裁定，社交媒體巨頭 Meta（旗下擁有 Instagram）同 Google 旗下嘅 YouTube，因為喺產品設計上刻意誘導青少年「上癮」，導致一名女原告出現嚴重情緒問題，兩間公司合共要賠償 600 萬美元。呢單案係全美首宗針對「平台成癮設計」而成功獲判賠償嘅訴訟，法學界普遍認為，呢個「先例」一開，未來恐怕會引發針對矽谷巨頭嘅訴訟潮。

今次案件嘅原告係現年 20 歲嘅加州女子卡莉（Kaley，庭上代號為 K.G.M.）。佢喺庭上聲淚俱下咁憶述，自己從 6 歲就開始接觸 YouTube，到 9 歲就瞞住屋企人偷偷開咗個 Instagram 帳號。卡莉話，呢啲平台好似「黑洞」咁吸走咗佢嘅童年，最瘋狂嘅時期，佢每日會花超過 16 個鐘喺社交平台上面。

卡莉嘅律師團指出，長期沉迷社交媒體令到卡莉患上嚴重嘅焦慮症、抑鬱症，甚至出現身體臆形症（Body Dysmorphia），成日覺得自己唔夠靚而產生自殺念頭。律師形容，Meta 同 YouTube 嘅設計好似「特洛伊木馬」咁，表面上係畀人娛樂同社交，實際上係利用演算法同心理弱點，將細路仔鎖死喺螢幕前面。

經過長達六個禮拜嘅審訊同超過 40 個鐘嘅商議，陪審團最終認定，兩大科技巨頭喺設計平台嗰陣存在「過失」。判決書入面提到，平台嘅「無限捲動」（Infinite Scroll）、「自動播放」（Auto-play）同「即時通知」功能，本質上就係一種「成癮工程」。

賠償金額方面，陪審團裁定兩間公司需支付 300 萬美元嘅補償性賠償（Compensatory Damages），另外再加碼 300 萬美元嘅懲罰性賠償（Punitive Damages），合共 600 萬美元。其中 Meta 被判定要承擔 70% 嘅責任（即 420 萬美元），而 YouTube 則承擔其餘 30%（即 180 萬美元）。有陪審員喺庭外表示， Meta 創辦人朱格伯（Mark Zuckerberg）早前出庭作證嗰陣語帶閃爍，令陪審團覺得公司根本無心悔改，所以決定重罰。

面對呢場敗仗，Meta 同 YouTube 都表示「極度失望」並表明會上訴。Meta 發言人發聲明話：「青少年嘅心理健康問題極之複雜，受家庭環境、學校社交等好多因素影響，唔可以簡單咁歸咎於單一應用程式。」

而 Google 方面就更加「委屈」，發言人卡斯它尼達（Jose Castaneda）強調 YouTube 係一個「負責開源嘅串流影音平台」，唔應該被當作一般社交媒體咁看待。佢地認為，呢次判決係對 YouTube 運作模式嘅重大誤解。

今次判決之所以咁觸目，係因為佢成功繞過咗美國《通訊規範法》（Communications Decency Act）第 230 條呢塊「免死金牌」。過往，科技公司可以推話平台內容係第三方發布，所以唔使負責任；但今次原告律師好聰明，佢地唔係告啲「內容」有問題，而係告個「產品設計」本身有缺陷（Product Defect）。

呢個策略嘅成功，為全美各地幾千單排緊隊嘅類似官司打咗支強心針。有法律專家形容，呢次裁決就好似九十年代對抗大煙草商嘅訴訟咁，代表住社會開始要求科技巨頭為佢地「令人上癮嘅產品」負起法律責任。

雖然 600 萬美元對呢啲富可敵國嘅企業嚟講只係「碎銀」，但呢單案帶嚟嘅聲譽損害同未來可能面臨嘅監管壓力，絕對令矽谷巨頭坐立難安。