美伊戰事踏入第四個星期，國際油價已經大幅飆升五成。美國國內對開戰後嘅經濟衝擊越來越擔心，覺得華府未有預計到封鎖霍爾木茲海峽帶嚟嘅嚴重後果，戰爭目標亦都唔夠清晰。根據美國新聞網站 Axios 嘅報道，美國總統特朗已經開始籌備同伊朗和談嘅策略，並透過埃及同卡塔爾等國家進行幕後斡旋，希望伊朗可以答應六項核心要求。

報道引述知情人士透露，特朗普嘅女婿庫什納同中東特使威特科夫都有份參與呢次外交規劃。美方開出嘅和談大原則包括重新開放霍爾木茲海峽，同埋解決伊朗濃縮鈾庫存等棘手問題。具體嘅「六大保證」要求伊朗：第一，未來五年內唔可以推動彈道導彈計劃；第二，完全停止製造濃縮鈾；第三，永久拆除喺上年被美以聯軍轟炸過嘅納坦茲、伊斯法罕同福爾多等核設施；第四，嚴格落實外部監督協議，全面監管濃縮鈾離心機同埋核武相關機械嘅製造同使用；第五，同中東國家簽署軍事控制條約，將導彈數量明確限制喺一千枚以內；第六，全面停止資助包括黎巴嫩真主黨、也門胡塞武裝，以及加沙 (Gaza) 嘅哈馬斯等區內代理人組織。

不過，伊朗一直以嚟都多次拒絕上述部分要求。德黑蘭政府表明，要同特朗普呢種喺談判期間隨時下令轟炸嘅人再坐埋一張枱，係非常之困難。據了解，美伊近期並無直接接觸，但埃及同卡塔爾早前向美以兩國傳話，指伊朗雖然有談判意向，但立場極度強硬，要求美軍同以軍必須先停火、保證日後唔再動武，仲要求美方提供戰爭賠償。

面對伊朗索償，特朗普早前已經一口拒絕，直指賠償要求係「絕對無可能」。特朗普早前亦喺Truth Social 發文，強調美軍正全面摧毀伊朗政權，並誇下海口指伊朗海空軍已經不復存在。不過，有美國官員就提出一個折衷方案，建議可以俾伊朗攞返被凍結嘅海外資產。華府方面可以對內宣稱係「歸還凍結資金」，而伊朗就可以對外聲稱係「賠償」，透過玩文字遊戲俾雙方一個政治落台階，解決內部共識嘅問題。事實上，特朗普喺剛過去嘅周末態度依然強硬，曾經發出四十八小時最後通牒，但現有消息指特朗普將會推後五天，並警告伊朗如果唔即時開放霍爾木茲海峽，美軍就會出動轟炸伊朗嘅發電廠。更有美國內部消息指，白宮正考慮進佔甚至封鎖伊朗極具戰略價值嘅石油樞紐哈爾克島，以強硬手段逼使德黑蘭就範。另一方面，俄羅斯總統普京曾提議將伊朗嘅濃縮鈾轉移到俄羅斯以平息戰火，但呢個建議亦已經被特朗普果斷拒絕。

目前，特朗普團隊喺推動和談上面臨緊兩大難題。第一係搵唔到真正拍板嘅對話人。隨住戰局發展，美國中央情報局正全力追蹤伊朗新任最高領袖穆杰塔巴嘅下落，美方官員認為，一直出面做中間人嘅伊朗外長阿拉格齊，其實只係一個「傳聲筒」，華府仍喺度摸索緊德黑蘭背後真正嘅決策者究竟係邊個。第二個難題係未選定最合適嘅調解人。雖然阿曼曾經斡旋過上一輪伊核協議，但美國對佢哋缺乏信任。目前美方傾向搵卡塔爾幫手，認為卡塔爾處理加沙問題時效率夠高，表現可靠，但卡塔爾似乎只係想喺幕後提供協助，唔願意成為官方嘅主要調解方。

另一邊廂，多國亦正加緊外交斡旋。土耳其外交界消息透露，土耳其外長菲丹近日分別同伊朗外長阿拉格齊、埃及外長阿卜杜勒阿提、歐盟外交政策負責人拉斯，以及多名美國官員通電話，積極商討點樣平息呢場牽涉美國、伊朗同以色列嘅地區戰爭，務求盡快令中東局勢降溫，避免引發更大規模嘅全球能源危機。