港府近年大力推動「高端人才通行證計劃」（高才通），原意係搶人才、補勞動力，但制度漏洞問題開始浮面。一宗涉及虛報學歷申請高才通嘅案件，近日喺沙田裁判法院正式開審。一名36歲持雙程證嘅內地女子，被控串謀詐騙，指佢涉嫌透過虛構學歷，成功令入境處批准佢同一家五口來港定居。

被告徐麗娜（36歲，中國籍，持雙程證），被控一項「串謀詐騙」罪。控罪指佢喺2024年某日，喺香港或其他地方，聯同一名叫「孫先生」嘅人士，串謀詐騙香港特區政府入境處處長同其職員，即係以虛假資料聲稱符合高才通B類資格，誘使入境處喺本來唔會批准嘅情況下，批出佢本人、丈夫徐亮波以及三名子女共五人來港同逗留。

案情顯示，入境處喺2024年3月7日收到徐麗娜嘅網上申請，當中附有聲稱係澳洲悉尼科技大學（University of Technology Sydney）嘅畢業證書同成績表副本。入境處審閱文件後，批准申請。五人喺同年4月6日經羅湖入境香港，徐麗娜即日到長沙灣政府合署申請香港身份證。但到2025年4月16日，佢喺落馬洲支線管制站出境時被截停，隨即被捕。

徐麗娜出庭作供時，強調自己學歷其實只係「自學大專」，從未去過澳洲讀書，甚至喺被捕之前，從未見過涉案嘅畢業證書同成績表。佢直言，所有申請都係由中介處理，自己只係提供基本個人資料，之後先發現畀中介呃咗。

根據被告說法，整個申請係由朋友介紹開始。佢丈夫嘅生意拍檔李曉波，介紹一名朋友伍商陸，伍再介紹中介孫乾俾佢哋認識。孫聲稱可以代辦高才通申請，並建議佢哋用「收入達250萬」嘅方式申請，即A類途徑。2024年2月底，兩人喺深圳前海深港青年夢工場見面，向孫提供資料，包括徐麗娜「自學大專」學歷，以及丈夫「高中未畢業」背景。

孫乾之後開價52萬元人民幣，分兩期收費，包括申請前同成功獲批後付款。徐麗娜庭上表示，當時覺得「雖然貴，但合理」，因為身邊朋友移民外國嘅成本都差唔多。之後佢填寫一份個人資料表，提供姓名、電話、住址等基本資料，並簽署文件，之後所有程序由中介處理。

被告實際上係透過B類申請（即需持學士學位及工作經驗）成功獲批，而唔係原先理解嘅A類。辯方庭上展示入境處提供嘅電子申請表，被告指出表內嘅電郵、電話同地址全部唔屬於自己，亦從未見過該份申請文件。換言之，有人以佢名義提交另一套完全唔同嘅資料，包括偽造學歷。

控方亦傳召負責審批申請嘅入境事務主任龐彥文作供。龐指，當時喺2024年3月28日接手審核該宗申請，檢視所有文件後，確認申請人係「合資格大學畢業生」，於是即日批准申請。佢亦坦言，喺當時制度下，如果冇合理懷疑，一般唔會主動核實申請人學歷。

龐進一步透露，佢每日需要處理約30至40宗申請，工作量相當大。徐麗娜呢宗個案文件齊全，雖然涉及4名受養人，資料較多，但整體屬「簡單個案」，大約用45分鐘完成審批。

辯方盤問時指出，根據申請文件，被告喺2008至2011年間就讀悉尼科技大學，但佢長女喺2010年出生，即意味住佢當時「似乎仲讀緊大學同時生仔」。辯方問入境主任會唔會懷疑「懷住孕，點樣讀書呢？」龐回應：「呢個唔係高才通申請裏面」，並表示自己當時冇留意。

另外，負責拘捕被告嘅入境事務助理梁倩怡亦作供，指喺2025年4月16日截停徐麗娜時，對方回答問題「好快」、「無諗」，即場承認係透過高才通來港，亦確認自己從未去過澳洲讀書，甚至未聽過悉尼科技大學。佢同時表示，申請係經一名姓孫嘅中介處理。

被告補充，當時中介喺微信通知佢「已經遞交」，並附上一份PDF文件，但因為檔案太大，佢冇打開睇。其後喺3月28日，中介再通知「一家人全部成功獲批」，佢丈夫隨即支付尾數同1000元辦理身份證費用。

案件另一關鍵發展係中介失聯。徐麗娜表示，喺2025年4月被捕後，丈夫曾嘗試聯絡孫乾，但對方其後完全失去聯絡，最終丈夫向內地公安報案。徐麗娜庭上直言：「事情發生之後，我哋發現被中介呃咗。」案件目前仍在審理中，控方稍後將盤問被告。庭審結束後，被告離開法庭時，一度同同行人士挽手快步離開，其間意外跌倒。