歐盟為咗打擊來自中國嘅平價網購商品，計劃喺今年7月1日起祭出新招，向價值低於150歐元嘅小包裹徵收3歐元嘅統一關稅。不過，比利時海關與消費稅署署長萬德瓦倫 (Kristian Vanderwaeren) 就大潑冷水，警告呢項新政根本無辦法遏制平價中國貨湧入歐洲嘅狂潮。隨住Shein同Temu等電商平台喺歐洲急速擴張，歐盟各地海關已經做到踢晒腳，每日要應付數以億計嘅包裹，既要查驗有無違禁品同符合安全標準，又要確保關稅無漏網之魚。

萬德瓦倫接受傳媒訪問時坦言，布魯塞爾當局以為廢除「小額包裹免稅」規則就可以解決問題，但其實只係一廂情願。目前，價值低於150歐元嘅商品係免繳關稅嘅，而新政策實施後，消費者無疑要俾多啲錢，但萬德瓦倫認為加幅根本唔夠痛，對減少低價值包裹流入歐洲嘅作用微乎其微。佢指出，依家海關面臨緊一個相當嚴峻嘅危機，單靠小修小補係無補於事。

數據就最誠實。單單喺舊年，歐盟已經接收咗高達58億件低價值包裹，數量比2022年暴增超過四倍，而且增長勢頭絲毫無減弱嘅跡象。據歐盟委員會嘅統計，呢啲包裹當中有九成都係來自中國。比利時嘅列日機場作為大型航空貨運樞紐，理所當然成為咗呢啲平價包裹嘅最大集散地。舊年入境比利時嘅包裹數量高達14億件，佔咗全歐盟進口總量差唔多四分之一，令當地海關不勝負荷。

為咗保障歐洲本地製造業，為市場創造公平嘅競爭環境，歐盟定於今年7月1日起，對直接寄俾歐盟消費者嘅小包裹，按每個商品類別徵收3歐元嘅關稅。換句話講，如果消費者上網買咗三件T恤、一對襪同埋一件玩具，由於涉及唔同嘅商品分類，成張單可能要硬食9歐元甚至更多嘅關稅。除咗關稅之外，由於意大利同羅馬尼亞等國家已經開始徵收本國關稅，導致唔少包裹被轉運避稅，歐盟仲打算喺今年11月起對每個包裹額外徵收2歐元嘅「處理費」，試圖用成本優勢嚟逼退廉價商品。

呢場中歐包裹大戰嘅背後，其實同美國息息相關。美國早前取消咗800美元以下小額商品嘅關稅豁免，同時不斷收緊貿易政策同大幅加徵關稅，令中國出口商大感頭痛。萬德瓦倫分析話，包裹數量嘅激增明顯同特朗普落實嘅強硬政策有關。當中國商家發覺好難再將產品順利出口到美國市場時，佢哋自然會尋求其他出路，而購買力強勁、一直對進口商品相對包容嘅歐洲就順理成章成為咗最佳嘅替代市場。

依家喺比利時列日機場，海關人員可以話係做到氣咳。比利時每日要處理380萬份清關申報單，但人手同資源嚴重短缺，海關只能夠對唔夠百分之一嘅包裹進行實物抽查。更令人擔憂嘅係，喺被抽查嘅貨物當中，有近三分之一存在安全隱患、屬於假冒偽劣產品，或者申報資料同實物根本唔夾。好多商家為咗逃避關稅，會喺報關單上做手腳，例如偽造原產國或者故意報低商品價值。呢種螞蟻搬家式嘅走私手法，令歐洲海關防不勝防。

呢項3歐元嘅關稅新政，其實係歐盟成員國正喺度敲定嘅更廣泛海關改革嘅一部分，成個改革預計要到2028年先會全面落實。歐盟嘅最終目標係將海關系統全面數碼化，建立一個中央機構同數據中心嚟簡化合法商人嘅手續，同時賦予海關更大嘅權力同先進系統去監控進口貨物。

不過，所謂道高一尺魔高一丈。海關專家早就睇穿咗新規則嘅漏洞，警告進口商只要提交更詳細嘅報關單，就有可能規避呢3歐元嘅關稅。歐洲海關行業專家範德梅倫 (Walter Van Der Meiren) 分析指出，呢個漏洞會令貨運公司需要填寫極度複雜嘅報關單，而對於書籍、藥品同軟件媒體等本來就唔產生進口關稅嘅商品類別，呢啲繁複嘅手續根本無意義。佢批評新政策只會加重各國海關資訊系統嘅負荷，甚至隨時拖垮成個網絡，最終連預期嘅庫房收入都達唔到，變成捉到鹿脫唔角嘅尷尬局面。雖然歐盟委員會官員表示正努力修補規則漏洞，以防出現扭曲市場嘅現象，但面對排山倒海嘅中國平價貨，歐洲海關嘅防線似乎仍然係岌岌可危。