中東局勢進一步惡化，正當伊朗同以色列、美國嘅軍事衝突打得火熱之際，伊朗官方宣佈，已經處決咗一名被指控為以色列「摩薩德」（Mossad）做間諜嘅瑞典籍男子。呢單案係自今年 2 月底伊朗與美以開戰以來，首次公開執行嘅死刑案件，隨即引發瑞典政府同歐盟嘅強烈反彈。

根據伊朗司法部旗下傳媒《米贊在線》（Mizan Online）嘅報導，呢名被處決嘅男子叫旗華尼（Kourosh Keyvani）。當局指控佢係喺 2025 年 6 月，即係伊朗同以色列爆發「十二日戰爭」期間被捕。

報導指，旗華尼涉嫌多次同以色列情報部門會面，仲曾經喺 6 個歐洲國家同埋特拉維夫接受過專業情報訓練。伊朗軍方聲稱，旗華尼利用先進嘅通訊同監控設備，向敵方傳遞伊朗境內敏感軍事設施嘅圖像同埋數據，對伊朗國家安全構成「極大威脅」。最終，法院以「土地腐敗罪」（Corruption on Earth）以及「為敵對國家從事間諜活動」為由，判處佢死刑。

瑞典外交部長絲田尼嘉（Maria Malmer Stenergard）喺事後證實，一名瑞典公民已經喺伊朗被處死。佢形容呢種行徑係「殘酷且非人道」。

絲田尼嘉向傳媒透露，瑞典政府喺行刑前一晚收到風，知道死刑好大機會即刻執行，於是連夜嘗試聯絡德黑蘭官方，要求暫緩處決並安排緊急會談。點知伊朗方面完全「唔睬人」，拒絕咗所有外交會面要求。

最令瑞典方面憤怒嘅係，儘管旗華尼喺2019年已經入籍瑞典，但係伊朗一向唔承認雙重國籍，堅持認為旗華尼係伊朗人，所以由始至終都唔畀瑞典領事探視，亦都冇提供過任何符合法治原則嘅公開審訊。絲田尼嘉直言：「呢個司法過程根本完全冇遵守法治原則。」

呢次處決事件亦都令歐盟同伊朗嘅關係跌到冰點。歐盟外交同安全政策高級代表卡拉斯（Kaja Kallas）發表聲明，強烈譴責伊朗政權嘅「殘酷暴力行徑」。卡拉斯指出，喺目前緊張嘅戰雲之下，伊朗利用處決外國公民嚟做政治籌碼，係「毫無意義嘅殺戮」，並呼籲德黑蘭立即廢除所有死刑。

目前中東戰事正處於關鍵階段。自 2 月 28 日美以聯軍空襲伊朗以來，德黑蘭國內正進行大規模嘅「肅諜行動」。伊朗警察首長拉丹（Ahmad-Reza Radan）日前先至宣佈，已經逮捕咗超過 500 名涉嫌「向敵人洩密」嘅人士。

有專家分析認為，伊朗今次高調處決瑞典公民，一方面係想喺國內建立威嚴，警告民眾唔好同外國勢力勾結；另一方面，亦都係想向國際社會，特別係支持以色列嘅歐洲國家施壓。喺呢種「人質外交」同戰時法律嘅夾擊之下，雙重國籍人士往往成為咗政治博弈嘅磨心。

斯德哥爾摩當局已經傳召咗伊朗大使表示強烈抗議，但係喺炮火連天嘅中東，外交抗議嘅聲浪似乎顯得相當無力。