中國今年全國兩會將2026年增長預期設定喺4.5%至5%之間，較過去幾年一直維持喺「5%左右」嘅水平出現下調。中共黨刊《求是》發表評論指，當前國內外存在一啲針對中國經濟嘅負面論調，包括所謂「中國經濟崩潰論」同「中國威脅論」。文章認為，呢啲說法係由一啲「反中勢力」基於各種原因刻意散播，並強調有必要及時回擊，從而塑造國際社會對中國發展前景嘅「正確認知」。

《求是》喺最新一期刊出題為〈持續做好穩預期工作〉嘅評論員文章，當中指出，「預期管理」係宏觀經濟治理嘅重要組成部分，中央對此高度重視，並強調要持續加強相關工作，同時完善預期管理機制。文章明確將預期管理提升至政策層面，視為經濟調控中不可或缺嘅一環。

文章進一步指出，無論喺國內定國際層面，一啲唱衰中國經濟嘅謬論，已經對部分生產者同消費者行為產生「誤導」，並影響宏觀調控效能同經濟穩定運行。文章強調「信心比黃金更重要」，認為面對當前市場預期偏弱所帶來嘅影響，必須更加重視預期管理同引導，務求實現「穩預期、強信心、穩經濟」之間嘅相互促進，形成良性循環。

喺政策執行層面，文章呼籲各地區同各部門要及時回應社會關切，加強對政策嘅宣傳同解讀，並完善政府同各類經營主體之間嘅溝通交流機制。同時，要做好政策嘅主動同精準送達，確保市場能夠充分了解同有效運用相關政策工具。

另外，文章亦提出，要堅持「正確輿論」導向，並創新經濟宣傳嘅話語同方式，有效針對各類熱點問題進行引導，同時理性辨析各種聲音，最終目標係「唱響中國經濟光明論」。呢一部分顯示，官方將經濟敘事同輿論引導視為政策體系中嘅一部分。

文章亦指出，隨住中國經濟同全球經濟進一步深度融合，國際輿論對國內社會預期形成嘅影響正逐步加大。喺呢個背景之下，一啲被形容為「反中勢力」嘅聲音，持續散播各種版本嘅中國經濟「崩潰論」同「威脅論」，對市場預期產生影響。文章進一步表示，如果未能及時同有效回擊呢啲「錯誤敘事」嘅邏輯，唔單止會影響全球市場同外資企業對中國發展前景嘅判斷，亦會將相關影響反向傳導至國內，從而影響各方面嘅預期。

最後，文章總結指出，喺當前複雜嘅國際輿論環境之下，有必要加強對外宣傳同國際輿論引導，並強調要善於主動設置議題，及時回應並反擊包括「中國經濟見頂」、「中國產能過剩」同「外資撤離中國」等各類論調，以進一步塑造國際社會對中國經濟發展前景嘅「正確認知」。

事實上，依家中國經濟三頭馬車（消費、投資、出口）嚴重失衡。消費方面，2025年社會消費品零售總額只增長3.7%，去到12月單月更只係按年升0.9%，按月仲倒退0.12%，反映居民消費意欲明顯偏弱。投資方面更加難睇，2025年全社會固定資產投資跌3.9%，其中房地產投資暴跌17.5%，基建投資亦跌2.2%，民間投資跌6.4%，說明企業對前景並無信心，地方政府亦失去過往靠基建托底嘅空間。

至於出口，表面上似乎仲係撐得住。中國2025年錄得1.189萬億美元創紀錄貿易順差，2026年首兩個月出口仲按年急升21.8%。但呢個現象唔代表經濟健康，反而證明中國經濟更加依賴外需，內部失血未止。中國而家最大問題係國內需求疲弱、樓市長期低迷同持續通縮壓力，出口愈強，只會愈暴露結構失衡：內需救唔起，唯有繼續向外傾銷產能。

最殘酷嘅係價格。2025年全年CPI幾乎係零增長，係16年來最弱；到2026年1月，CPI只係升0.2%，PPI就再跌1.4%；到2月，雖然受農曆新年因素帶動，CPI短暫抽高，但PPI仍然按年跌0.9%，顯示工業品價格壓力仲喺度，製造業利潤空間繼續被蠶食。