澳洲當局星期一證實，再有一名尋求澳洲庇護嘅伊朗國家女足代表隊成員，決定放棄難民資格並離開澳洲。隨住球隊隊長甘巴里 (Zahra Ghanbari) 喺尋晚深夜搭飛機飛往馬來西亞，原本獲批澳洲人道簽證嘅七名女足代表同埋隨行人員當中，已經有五個人先後改變初衷，踏上返國之路。目前只剩下兩名球員仍然留喺澳洲。事件引起國際社會同人權組織高度關注，有流亡海外嘅前國腳更加爆料，指出伊朗當局對留澳球員嘅國內家屬施加咗難以想像嘅殘酷威脅，甚至傳出有綁架同死亡恐嚇，逼使呢班球員妥協。

回顧事件起因，伊朗女足喺今年二月前往澳洲出戰女子亞洲盃。喺三月二日對陣南韓嘅分組賽入面，多名伊朗球員喺賽前奏國歌環節保持沉默。呢個舉動喺正值美國同以色列空襲伊朗嘅戰爭陰霾下，隨即被伊朗國內強硬派同官方傳媒猛烈抨擊，甚至將佢哋標籤為「戰時叛徒」，並揚言要嚴懲。為咗保障球員人身安全，加上美國總統特朗普 等國際領袖公開發聲關注，澳洲政府迅速介入。特朗普早前喺社交平台發文，警告如果澳洲將球員遣返，將會犯下嚴重嘅人道錯誤，佢更親自致電澳洲總理阿爾巴內塞討論對策。最終，澳洲內政部長柏克 (Tony Burke) 喺三月初親自批准向七名主動求助嘅伊朗隊代表發出人道簽證，並將佢哋安置喺安全屋，而其餘大部分職球員就按原定計劃經吉隆坡返國。

不過，事態喺過去一個星期出現戲劇性轉折。繼早前有一名球員率先放棄庇護之後，澳洲內政部長柏克嘅辦公室證實，上星期六再有兩名球員同埋一名職員離開雪梨，飛往馬來西亞同大隊會合。直到星期日深夜，連陣中主力兼隊長甘巴里亦都決定放棄難民身分。柏克強調，澳洲政府一直盡最大努力保護呢班女性，內政部喺批准佢哋撤回申請之前，已經給予咗佢哋多次重新考慮嘅機會，確保佢哋明白潛在嘅風險，但最終當局都係選擇尊重佢哋嘅個人決定。

外界普遍相信，呢幾位球員之所以突然改變主意，背後牽涉龐大嘅政治壓力。流亡海外嘅前伊朗女足國腳阿米尼 (Shiva Amini) 喺社交平台發文透露，伊朗足球協會聯同伊斯蘭革命衛隊 (IRGC) 對留澳球員嘅家屬進行咗有系統而且密集嘅施壓。阿米尼指出，有球員收到屋企人嘅秘密留言，有母親喺語音訊息入面喊住叫個女「唔好返嚟，佢哋會殺咗你」，但亦有家屬疑似受到脅迫，要求球員必須回國。澳洲有伊朗僑民團體更聲稱，部分家屬遭到當局傳喚盤問，甚至面臨被綁架嘅風險。面對無休止嘅恐嚇，球員因為擔心遠喺家鄉嘅親人安危，最終承受唔住壓力而被迫放棄尋求自由嘅機會。

對於成功勸退多名球員，伊朗官方傳媒形容甘巴里等人嘅決定係一項愛國表現，並聲稱佢哋係重新回到祖國溫暖嘅懷抱。官方亦都藉機反咬一口，批評澳洲政府高調處理庇護事件，係出於政治目的。事實上，澳洲政界內部亦有聲音質疑當局今次嘅處理手法。影子移民部長杜尼安 (Jonno Duniam) 就批評執政工黨喺事件初期大肆宣傳，無疑係增加咗球員嘅曝光率，令伊朗政權覺得面目無光，繼而加大力度報復球員嘅家屬。有前移民部高級官員亦指，政府公開向一班人提供庇護嘅做法非常罕見，變相令遠喺家鄉嘅家屬陷入更大風險。

目前，仍然有兩名伊朗女足球員留喺澳洲境內。佢哋嘅去留以及人身安全，繼續成為國際焦點。喺戰爭陰霾同埋政治角力嘅夾擊之下，呢班原本只係想追逐夢想嘅女運動員，無奈捲入咗一場殘酷嘅國際風波。