美國總統特朗普接受專訪時，直言雖然伊朗已表達停戰意願，但現時條件仍未成熟，他暫時不想接受談判。特朗普更公開質疑伊朗新任最高領袖穆傑塔是否仍然在世，話「我根本唔知佢而家仲係咪在生」，因為對方自周四接任後，一直冇透過視頻公開露面，只發書面聲明，呢個情況令人懷疑。佢仲聽到消息指穆傑塔巴「可能已經死左」，若然真係仲生存緊，最聰明做法就係為國家選擇投降，不過特朗普強調呢啲暫時只係傳言。

美國防長早前亦指穆傑塔巴「已受傷，而且很可能毀容」，書面聲明「非常軟弱」，可能因為怕傷、在逃亡，缺乏合法性。特朗普當被問到理想嘅伊朗未來領袖人選時，冇直接回答，只話「而家仲活住嘅人當中，有一些將來會成為不錯嘅國家領導人」，但拒絕透露有冇同佢哋保持聯繫，怕令佢哋陷入危險。

呢次專訪喺中東戰事持續升溫嘅背景下進行。自上個月美國同以色列聯合空襲伊朗後，衝突全面爆發，伊朗隨即反擊以色列同區內美軍目標。特朗普提到，美軍周六對伊朗重要石油出口樞紐哈爾克島 (Kharg Island) 發動攻擊，「幾乎將成個島炸平」，主要針對軍事設施，而非石油基建，但佢笑言「我哋可能仲會再打幾次，純粹覺得好玩」。美國官員確認今次行動摧毀咗超過90個軍事目標，包括導彈儲存庫同海軍設施，伊朗則揚言若石油設施受襲，會摧毀整個地區油氣設施。

特朗普表示，伊朗而家只剩海上佈雷同發射短程導彈嘅能力，話「等我哋處理完佢哋成條海岸線，佢哋連呢點啲能力都唔會再有」。佢宣稱美國已摧毀伊朗大部分導彈、無人機同埋製造呢啲武器嘅能力，「再過兩日就會完全結束」。不過，政府內部對戰爭目標同持續時間嘅說法一直唔一致，早前有時指可能打一個月甚至更耐，有時又話「進展得非常快，幾乎冇目標能再打了」。截至現時，衝突已造成至少13名美軍士兵死亡，包括周五一架KC-135加油機喺伊拉克墜毀，6名機組人員喪生。

戰事亦波及區內多國。特朗普話佢對伊朗轉而攻擊其他中東國家感到「好意外」，包括阿聯酋、卡塔爾、沙特阿拉伯、巴林同科威特等地，伊朗發射大量無人機同導彈，目標涵蓋石油設施、物流中心同政府機構。截至現在，伊朗已向相關地區發射超過1475架無人機。伊拉克官員更指，周六伊朗一次攻擊命中巴格達美國大使館區內直升機起降場。特朗普讚揚美國盟友「表現得非常好」，但無端端遭受攻擊，係整件事最令佢驚訝嘅部分。

喺專訪中，特朗普仲回應油價問題，話自己任期內汽油價格曾創歷史新低，承諾戰事結束後油價很快回穩，唔會影響共和黨中期選舉表現。佢唯一想做嘅，就係確保伊朗永遠無法再喺中東作亂。對於暫時放寬對俄羅斯石油制裁以壓低油價，特朗普解釋希望全球石油供應充足，制裁源於2022年俄烏衝突，危機結束後自然恢復。佢批評澤連斯基「不願意談判」，話「同澤連斯基談判，仲難過同普京」，雖然澤連斯基曾表示願意協助攔截伊朗無人機，但特朗普話「我哋完全不需要澤連斯基嘅協助」。