近日爆紅嘅人工智能代理軟件OpenClaw，係內地短短一個星期，經歷咗由全民瘋狂下載到集體恐慌卸載嘅戲劇性轉變。呢款因為標誌設計似一隻龍蝦，而被內地網民親切地暱稱為「龍蝦」嘅嶄新 AI 軟件，同以往嘅對話機械人唔同，佢主打能夠「自主執行任務」。軟件除咗擁有傳統 AI 嘅對話功能之外，仲可以幫用家自動收發電郵、管理日常編排、預訂機票酒店，甚至全權代為經營社交媒體帳號。唔少人原本幻想可以靠 AI 處理繁瑣工作，甚至用嚟做自媒體圖利，隨即喺內地掀起一股「養龍蝦」熱潮。不過，隨住官方發出國家級安全警示，加上爆出天價 Token 帳單同系統騎劫風險，呢場科技美夢瞬間變成噩夢，更加催生咗一班趁火打劫嘅「代客卸載」黨。

中國國家互聯網應急中心喺今個月十號正式介入，針對 OpenClaw 發出強烈嘅安全應用風險提示。當局指出，OpenClaw 為咗順利實現接管電腦嘅功能，預設會獲取裝置嘅高級系統權限。最大嘅危機在於，佢嘅默認安全配置極之脆弱，一旦有黑客或者惡意攻擊者搵到突破口，就可以毫不費力咁獲取成部電腦嘅完全控制權。加上部分用家安裝同使用不當，已經引發咗嚴重嘅安全漏洞，極有可能導致大量個人機密資料外洩。Meta 超級智能實驗室嘅 AI 安全總監薩默·岳 (Summer Yue) 亦分享過，佢曾經將工作電郵交俾「龍蝦」打理，並特別加咗「未經許可唔准有任何操作」嘅限制，結果系統依然無視指令，瘋狂刪除咗二百幾封重要電郵。彭博社嘅最新消息亦指出，基於嚴重嘅保安顧慮，內地政府機構、國企以及各大銀行已經全面禁止喺辦公電腦上運行 OpenClaw。任何已經安裝咗軟件嘅企業或者機構員工，必須立即向上級申報，以便展開嚴格嘅安全檢查同埋執行拆除程序。超過十五間內地券商亦明文規定嚴禁員工私自下載，反映官方對呢次網絡危機嘅重視程度。

除咗系統後門同資料外洩風險，高昂嘅隱藏成本亦係令大批「養蝦人」急急腳跳船嘅主因。由於 OpenClaw 需要消耗大量運算資源，有深圳嘅程式員喺安裝第三日，就因為 API 密鑰被盜用，一覺醒來竟然收到高達一萬二千蚊人民幣嘅 Token 帳單。坊間甚至開始流傳一句說話：「月薪兩萬，養唔起一隻龍蝦」。與此同時，熱門社交平台小紅書亦宣佈，明確封鎖所有由 AI 託管工具完成嘅帳號操作，凡係主頁公開貼文全數由 AI 代發嘅帳號，將會面臨直接封鎖嘅處分，令一眾諗住靠「龍蝦」躺平賺錢嘅網民好夢成空。

最令一班普通用家頭痛嘅係，OpenClaw 根本係一款「請神容易送神難」嘅軟件。為咗深度接管系統，軟件會喺電腦嘅系統目錄底層留低後門檔案。比起一般普通軟件只要㩒個掣就可以刪除，OpenClaw 嘅設計令到普通人極難徹底清走佢。如果用家盲目咁手動刪除相關檔案，極容易導致成個系統崩潰，甚至繼續留有數據洩露嘅隱患。睇準大批用家急於「走鬼」嘅心理，內地短視頻平台小紅書同二手平台閒魚隨即湧現大量「付費卸載」服務。呢批位於上海等地嘅商家聲稱可以遙距幫手刪除軟件，標榜「安全徹底，無殘留」，收費由幾十蚊去到最普遍嘅一百九十九蚊人民幣不等。有報道更加指出，部分商家非常識做生意，同時提供協助下載同埋卸載嘅一條龍服務。幫人安裝收二百九十九蚊，幫人拆除就收一百九十九蚊。有從業者甚至聲稱，短短幾日已經憑住呢門手藝賺咗幾十萬。

唔少內地網民對呢班商家推出付費卸載服務議論紛紛，好多人感嘆「連呢種錢都有得賺」；亦有人無奈咁講「龍蝦真係唔好養」，怪大家當初一時衝動，留咗空位俾呢啲人轉空子。更加有網民笑言，如果搵同一個商家裝完又刪除，豈不是白白坐喺度俾人宰割，硬食四百九十八蚊人民幣嘅全套套餐。隨住外國「龍蝦」喺中國遭遇滑鐵盧，內地科網巨頭例如騰訊等已經高調出手，準備利用自家研發嘅 AI 智能體填補市場，全面進軍呢個潛力無限嘅領域。