英國對華政策，正進入一個極危險嘅矛盾期：一方面，工黨政府試圖重啟對華接觸、修補經貿關係；另一方面，中國同香港相關嘅間諜、滲透同跨國鎮壓風險，卻喺英國本土愈揭愈多。最新一宗震撼案件，就係倫敦法院審理兩名男子涉嫌替香港同中國政府監視在英香港民主派人士。

控方指，其中一人曾任香港警司，喺香港駐倫敦經貿辦工作；另一人就被指濫用英國官方系統蒐集資料，目標包括羅冠聰等在英港人。案件發生喺工黨政府力圖改善對華關係之際，政治訊號極為難看：北京同香港方面唔單止冇收斂，反而似乎認定英國仍然係可以落手操作嘅滲透場域。

更令工黨政府尷尬嘅係，呢啲唔再係單一案件。3月初，英國警方再拘捕3名涉嫌為中國從事敵對活動嘅男子，其中一人更係工黨國會議員丈夫。英國安全事務國務大臣翟偉紳公開承認，調查涉及中國試圖干預英國民主制度。問題係，當案件已經由港人社群監控，升級到英國政治圈內部滲透，政府仍然維持「高層接觸、務實合作」呢套語言，外界自然會質疑：工黨究竟係做風險管理，定係做政治自我催眠？

真正致命嘅，唔止係間諜案，而係英國自己嘅制度評估早已講得好清楚。英國國會人權聯合委員會喺2025年7月發表《英國境內跨國鎮壓》報告，直指外國政府正跨越國界，喺英國境內騷擾、恐嚇、監視、脅迫異見者，對象包括異議人士、記者、律師同流亡社群。到同年10月，政府回應雖然承認問題存在，亦提到曾聯同G7快速反應機制譴責香港警方對海外人士發出通緝令同懸紅，但至今最核心嘅問題仍然未解：英國有冇真正建立一套足以阻嚇北京同港府嘅代價機制？答案睇落仍然係冇。

呢個判斷唔係空口講。英國政府自己喺2025年7月25日，曾就香港警方再向海外港人發出新一輪拘捕令發表聯合聲明，批評呢種做法針對海外人士，並點明係跨國鎮壓。但到2026年1月，國會辯論再有人質問政府：點解英國至今仍未就香港相關侵權者實施制裁？議事錄中有議員直接指出，英國制裁名單上「一個香港官員都冇」，反觀美國已經制裁多名中港官員。換句話講，英國口頭譴責有，實質懲罰不足；政治姿態有，執行力度偏弱。對北京同港府嚟講，呢種訊號幾乎等同默許：你做，我鬧，但成本有限。

更具爭議嘅係，工黨政府一邊講國安風險，一邊又批准中國喺倫敦興建歐洲最大新使館。路透社1月報道指，英國政府最終批准呢項拖延多年嘅計劃，儘管有議員、居民同異見社群明確警告，擔心新使館成為監控、滲透同跨國鎮壓樞紐。英方解釋係安全風險可以管理，但呢種講法正正暴露工黨對中國問題嘅基本矛盾：政府明知威脅存在，卻仍押注於「可控風險」，但一旦判斷錯誤，代價唔止係一兩宗情報案件，而係整個倫敦作為流亡者避風港嘅可信度崩塌。