人工智能巨頭 OpenAI 嘅高層人事地震再次震驚科技界。OpenAI 機器人與消費硬件主管卡利諾夫斯基 (Caitlin Kalinowski) 尋日正式宣布辭職，原因係極度不滿公司近期與美國國防部（五角大廈）達成嘅人工智能軍事合作協議。呢次辭職風波唔單止反映出科技界對 AI 武器化嘅強烈擔憂，更將美國總統特朗普 政府聯手軍方打壓競爭對手 Anthropic 曝光。

卡利諾夫斯基 (Caitlin Kalinowski)網上發文證實離任消息，佢話呢個決定並唔容易，但係基於原則問題必須離開。佢喺帖文入面字字鏗鏘咁提到，雖然人工智能喺國家安全方面確實扮演住重要角色，但係「喺缺乏司法監督下對美國民眾進行大規模監控，以及喺無人類授權下使用致命自主武器，呢啲底線需要比目前更深思熟慮嘅討論。」佢強調自己對 OpenAI 行政總裁Sam Altman同埋整個團隊依然充滿敬意，但認為今次與五角大廈嘅合作協議落實得過於倉卒，完全缺乏清晰嘅安全護欄，直指呢個係一個嚴重嘅管治失誤。卡利諾夫斯基嘅履歷絕對份量十足，佢喺 2024 年 11 月先至加入 OpenAI，之前曾經喺 Meta 效力超過兩年半，帶領團隊研發備受全球矚目嘅 Orion 擴增實境 (AR) 眼鏡，更早期亦喺蘋果公司參與過多款 MacBook 嘅核心設計。

要徹底了解今次高層劈炮嘅導火線，就必須講返美國政府近期針對 AI 企業嘅大動作。政府最近同另一間標榜「安全至上」嘅人工智能公司 Anthropic 經歷咗一場充滿火藥味嘅談判。Anthropic 堅持拒絕放寬其 AI 模型 Claude 嘅安全底線，強烈反對將技術用於國內監控同埋完全自主嘅武器系統，特別係針對特朗普大力推動嘅「金穹頂」(Golden Dome) 太空導彈防禦計畫。結果，談判破裂後，特朗普不但喺社交平台 Truth Social 大罵 Anthropic 係「左翼癲佬」(Leftwing nut jobs)，更豪言將佢哋「好似狗咁炒咗」(fired like dogs)。美國國防部長海格塞斯甚至直接將 Anthropic 標籤為「供應鏈風險」，下令全聯邦政府機構封殺。

喺 Anthropic 俾政府無情封殺嘅同一日，OpenAI 竟然選擇「乘虛而入」，迅速同五角大廈簽訂合作協議，將其先進 AI 模型部署喺軍方嘅機密網絡入面。呢個舉動隨即引發極大爭議同埋公關災難，大批網民發起「刪除 ChatGPT」運動，海量用戶轉投 Anthropic 嘅懷抱，令到 Claude 應用程式嘅下載量一度霸佔榜首。面對群情洶湧，。Sam Altman事後亦不得不公開承認，喺競爭對手俾人踢走之後急急腳簽約，做法的確「睇落好投機同埋好草率」，並表示正嘗試修改協議條款以平息民憤。

除咗網民同用戶嘅杯葛，科技界內部嘅反對聲音亦都越來越大。據悉，有近 900 名來自 Google 同埋 OpenAI 嘅員工已經聯署發表公開信，強烈呼籲公司高層唔好向軍方妥協，拒絕讓自家產品淪為監控同埋自主殺戮嘅工具。聯署員工警告，美國政府正試圖透過恐懼嚟分化各間科技公司，迫使佢哋就範。呢種內部反彈嘅聲音，令到 OpenAI 處於極度尷尬嘅位置。

雖然 OpenAI 官方急忙撲火，發聲明強調與國防部嘅合作已經設定咗清晰嘅「紅線」，明文禁止將技術用於國內監控同埋開發自主武器，但卡利諾夫斯基嘅辭職明顯摑咗公司一巴。作為負責研發最具實體破壞力潛能，即係機器人部門嘅負責人，佢嘅離開正正帶出咗內部專家對呢啲所謂「紅線」是否真正有效存有極大質疑。隨住 AI 技術以前所未有嘅速度融入現代戰爭同國家安全體系，科技公司與軍方嘅博弈已經去到一個無法迴避嘅十字路口。今次嘅辭職風波，唔單止係 OpenAI 內部管治危機嘅冰山一角，更係全人類面對 AI 武器化危機嘅一個強烈警號。