隨住美以聯軍對伊朗發動代號為「史詩憤怒行動」（Operation Epic Fury）嘅大規模軍事打擊進入第 6 日，美國總統特朗普喺最新嘅視像講話中，再次向伊朗伊斯蘭革命衛隊（IRGC）發出強硬警告。特朗普直言，伊朗嘅軍事防禦已經「玩完」，要求軍方同警察即刻「放低武器」，否則將會面臨「必死無疑」嘅結局。

特朗普喺其社交平台 Truth Social 發表長約 8 分鐘嘅講話。佢喺片入面神情嚴峻，指出美軍喺過去幾日嘅行動進度「超前」，已經成功癱瘓咗伊朗嘅空防系統，甚至連伊朗海軍都已經「基本上消失咗」。特朗普話：「我再次敦促革命衛隊、伊朗軍隊同警察，即刻放低武器。只要你哋投降，我保證你哋可以得到全面豁免；如果唔係，你哋就只有等死，而且死狀唔會好睇（won’t be pretty）。」

佢又形容今次軍事行動係一場「正義之戰」，目標係要剷除呢個持續 50 年威脅美國同世界安全嘅「極端邪惡政權」。特朗普強調，美國唔會容許一個支持恐怖主義嘅國家擁有核武同遠程導彈：「佢哋成日嗌『美國去死』，我哋宜家就係要話畀佢哋知，美國係世界最強大嘅國家，呢啲威脅唔會再持續落去。」

特朗普喺講話中透露，目前已經有數以千計嘅伊朗軍人打電話要求投降，尋求豁免。佢話：「伊朗宜家打緊電話嚟問，點樣先可以達成協議（make a deal）。我同佢哋講：遲咗啲啦，宜家我哋比佢哋更想打。」佢預計整場軍事行動將會喺四星期內完成。

除咗威嚇革命衛隊，特朗普亦向伊朗民眾喊話，呼籲佢哋把握呢個「自由嘅時刻」。佢形容今次係伊朗「愛國者」奪回國家嘅最好時機，並承諾美國會作為後盾，支援佢哋建立一個唔會威脅鄰國、擁抱和平嘅新政府。

特朗普仲話，佢要親自參與遴選伊朗新任最高領袖，同委內瑞拉臨時總統羅德里格斯（Delcy Rodriguez）嘅情況一樣。佢喺受訪時講：「我無法接受哈梅內伊（Ayatollah Ali Khamenei）嘅仔。我哋希望有個可以為伊朗帶來和諧與和平嘅人選。」

不過，呢場戰爭亦引發全球金融市場動盪。受中東局勢升溫影響，國際油價持續走高，全球股市亦出現大幅波動。雖然美軍方面承認有6名官兵喺行動中犧牲，但特朗普強調，為了美國後代嘅安全，呢場仗係必須要打，亦一定要贏。