美國同以色列於2月28日凌晨聯手對伊朗發動代號為「史詩怒火」（Epic Fury）嘅大規模軍事行動，震撼全球。中國官方隨即密集發聲，由外交部、外長王毅到駐聯合國代表，一致採取強硬立場，批評美以兩國破壞國際法、侵犯主權，並呼籲立即停火。

空襲發生後，中國外交部發言人毛寧於同日晚間率先表態，指中方對美以軍事打擊伊朗表示「高度關切」。發言人強調，伊朗嘅國家主權、安全同領土完整應該得到尊重。北京方面呼籲相關各方「立即停止軍事行動」，避免緊張局勢進一步升溫，並返到對話談判嘅軌道，以維護中東地區嘅和平穩定。

隨住伊朗最高領袖哈梅內伊（Ayatollah Ali Khamenei）證實喺空襲中喪生，中共中央政治局委員、外交部長王毅於3月1日同俄羅斯外長拉夫羅夫通話時，語氣更加強硬。王毅直言，美以兩國嘅行為係「兩個不可接受」：

一、 談判期間動武不可接受：美以喺「伊美談判」進行緊嘅時候突然發動襲擊，係缺乏誠意嘅表現。

二、 公然擊殺領導人不可接受：王毅批評呢種公然殺害主權國家領導人、鼓動「政權更迭」（Regime Change）嘅做法，嚴重違反國際法同國際關係準則，令中東局勢陷入「危險深淵」。

中國常駐聯合國代表傅聰喺安理會緊急會議上亦發言，形容美以兩國悍然動武嘅時間點「令人震驚」。佢指出，武力唔係解決爭端嘅正確方法，只會加深仇恨。中方對於衝突導致大量平民傷亡感到「深感痛心」，並重申保護平民係唔可以逾越嘅紅線。

除咗外交層面，解放軍旗下的「鈞正平工作室」亦發表評論，指「和平唔係天跌落嚟嘅」，戰火亦唔會因為祈禱而遠離。評論提醒中國民眾要保持「居安思危」嘅清醒，指出現時國際情勢複雜，叢林法則依然盛行，國家必須具備足夠嘅防衛能力。

目前，中國駐以色列使館已啟動緊急撤僑機制，並表示持中國護照、港澳證件及台胞證者均可登記撤離至埃及。

官方貼文留言係另一幅光景，可謂「大炒車」。有網友話「今日真係好日子，心想事成」、「萬軍之中取敵上將首級，好！戰爭就該咁樣打」、「咁嘅好事唔係舉國歡慶40日咩」、「但伊朗民眾出晒街歡呼」。