近排如果大家有留意 TikTok 或者 Instagram，可能會發現一堆外國後生仔女唔再學韓星跳舞，反而係度研究點樣「變身中國人」。呢股被稱為「Chinamaxxing」嘅文化浪潮，正喺美國 Z 世代（Gen Z）之間瘋傳。佢哋唔單止學飲暖水、著室內拖鞋，甚至連生活態度都話要「全面中國化」。究竟呢班美國青年度諗緊乜？係一時貪得意定係反映緊更深層次嘅文化轉向？

所謂「Maxxing」係美國網絡流行語，意思係「極大化」或者「極致化」。加埋「China」喺前面，簡單嚟講就係「極致中國化」。呢個詞語最早源自一啲惡搞短片，但去到2026年初，已經演變成一種全方位嘅生活美學（Aesthetics）。

喺 TikTok 上面，最常出現嘅標題係「You met me at a very Chinese time in my life」（你喺我人生中最『中國』嘅時刻遇到我）。片入面嘅美國後生仔，會煞有介事咁示範「中國式養生」：朝早唔再飲冰啡，改為飲杯熱辣辣嘅滾水；返到屋企第一件事係換拖鞋，仲要強調「唔好帶室內塵入房」；更有甚至會去超市買「老乾媽」配意粉，或者係度鑽研點樣煮一碗「正宗」嘅皮蛋瘦肉粥。

同幾年前帶有嘲諷意味嘅「Bing Chilling」梗圖唔同，今次呢股 Chinamaxxing 浪潮顯得相對認真，甚至帶有一種崇拜感。有網民分析，呢種轉變同美國後生仔對現狀嘅不滿有關。

23 歲嘅網美 Sherry Zhu 就係呢股熱潮嘅推手之一。佢喺片入面教人點樣做一個「Chinese Baddie」，內容包括用刮痧板瘦面、飲紅棗蘋果水，同埋著起嗰件印有大隻字「中國」嘅復古 Adidas 運動褸。呢啲影片動輒獲得幾百萬次點擊，唔少外國網友喺下面留言話：「我覺得自己上一世可能係中國人」、「飲咗熱水之後，我啲皮膚真係好咗」。

有社會評論員指出，Chinamaxxing 嘅興起，反映咗西方年輕一代對美國基建老化、治安問題同埋高生活成本嘅「幻滅感」。對比起美國地鐵嘅殘舊，佢哋喺網上面見到重慶、上海呢啲城市好似未來都市（Cyberpunk）咁嘅景象，自然會產生一種嚮往。

但往往忽視呢啲「成就」係建立喺極強嘅公權力同壓制個人權利上，正常憲政國家要議會審預算，中國唔使，話做即做，梗係可以大搞基建。而啲基建是否真有需要同埋起完後嘅養護成本，好似不存在咁。

加上近年 C-Drama（陸劇）同埋「抖音妝容」喺海外爆紅，令到「中國風」變成咗一種「Cool」嘅代名詞。對於佢哋嚟講，學中國人生活唔單止係玩梗，更係一種對西方主流生活方式嘅反叛。