一直作風低調、極力淡化中國色彩嘅快時尚巨頭 Shein（希音），其創辦人兼董事長許仰天今日打破慣例，首次喺公開場合露面。佢喺廣州舉行嘅「廣東省高質量發展大會」上發表演說，高調讚揚廣東省對 Shein 全球成功嘅貢獻，並承諾會投資過百億人民幣，折合約十四至十五億美元，用作打造智能供應鏈體系。顯示左 Shein 喺海外上市接連觸礁後，急需重投祖國懷抱嘅戰略轉變。

許仰天今日身穿黑色西裝配棗紅色領帶出席大會。佢喺會上強調，Shein 會「繼續紮根廣東」，並投入巨資建設涵蓋人工智能同高端晶片應用嘅智能供應鏈體系 ，期望打造出世界級時尚產業集群。佢更加動情咁表示，Shein 成長嘅每一步，都離唔開呢片土地嘅滋養。佢大讚當地由服裝製造到物流嘅產業生態圈非常完善，官方提供嘅營商環境亦係世界一流，並將服務廣東製造業高質量發展視為公司嘅核心使命。

事實上，Shein 嘅發跡史同今次嘅高調表態形成強烈對比。公司起初喺江蘇南京創辦，2015年將總部搬到廣州，但隨住全球影響力擴大，為咗順利喺海外上市，公司喺2022年將總部遷往新加坡，努力洗脫中國企業嘅標籤。不過，佢哋嘅出海之路可以話係波折重重。起初，Shein 瞄準紐約上市，但遭到美國政界強烈反對。隨住美國總統特朗普 喺過去一年全面收緊貿易政策，包括喺去年正式終止小額豁免條款並加徵關稅，令 Shein 銷量同低價模式嚴重受創。

眼見美國夢碎，Shein 轉戰英國尋求喺倫敦上市。但喺英國首相施紀賢嘅政府管治下，政界對其勞工問題窮追猛打。除此之外，歐洲市場同樣面臨重重挑戰，德國總理默茨 同埋法國總統馬克龍等歐洲領袖亦曾明確表達對廉價傾銷及環保衍生問題嘅關注，令倫敦上市計劃目前處於停滯狀態。

面對英美兩地大門緊閉，Shein 唯有將目光放回亞洲，目前正秘密申請喺香港上市。不過，要喺香港掛牌，必須先獲得中國證監會開綠燈。外界普遍分析認為，許仰天今次極為罕有嘅公開露面，以及豪擲百億向廣東省表忠，正正係為咗向北京釋出善意，修補早前因「去中國化」而受損嘅關係。消息指，當地政府亦非常配合，例如近期大幅削減 Shein 喺廣州增城供應鏈總部項目近九成嘅水土保持補償費。由極力撇清中國關係，到今日重新擁抱廣東根基，Shein 嘅態度可以話係一百八十度大轉變。喺歐美市場日益嚴苛嘅貿易壁壘同監管審查下，呢間昔日嘅快時尚霸主能否憑住今次嘅誠意打動北京，成功登陸香港股市，將會係市場未來密切關注嘅焦點。