繼「愛潑斯坦案」令安德魯（Andrew Mountbatten-Windsor）身敗名裂後，澳洲與紐西蘭政府今日（24日）相繼開腔表態，公開支持廢除安德魯嘅王位繼承權。澳洲總理阿爾巴尼斯（Anthony Albanese）強調「無人可以凌駕法律」，並已致函英首相施紀賢（Keir Starmer），表示會全力支持相關立法程序。呢次係大英國協成員國首次集體對王位繼承順位提出明確挑戰，引起國際社會高度關注。

澳洲總理阿爾巴尼斯今日喺接受澳洲廣播公司（ABC）訪問時形容，安德魯所牽涉嘅指控係「極之嚴重」。佢指出，澳洲民眾對於安德魯同已故性罪犯愛潑斯坦（Jeffrey Epstein）之間嘅關係感到非常「嘔心」（disgusted），認為政府必須明確表達立場。

阿爾巴尼斯喺寫畀英國首相施紀賢嘅信件入面提到：「鑑於近期有關安德魯蒙巴頓溫莎嘅事件，我代表澳洲政府確認，我哋會同意任何將佢從王位繼承順位中移除嘅提議。」佢補充話，英王查理斯三世已經表明要依法辦事，澳洲政府亦認為必須進行全面、公正且妥善嘅調查。

緊隨其後，紐西蘭總理陸臣（Christopher Luxon）亦透過辦公室發表聲明，支持英方嘅做法。陸臣向傳媒表示：「無論英方達成咩結論，我哋肯定會支持。法律面前，人人平等。」佢強調，一旦英國政府決定動手修改法律，紐西蘭會全力配合。

安德魯目前喺英國王位繼承順位中排名第八，位列威廉王子同哈里王子兩家人之後。雖然佢去年已經被剝奪咗「王子」頭銜同所有王室頭銜，亦被趕出溫莎住所，但喺法律上，佢依然具備繼承權。

令今次事件急轉直下嘅關鍵，係安德魯喺今年2月19日——即係佢66歲生日當日——因為涉嫌「公職人員行為失當」被捕。據悉，警方正調查佢當年擔任英國貿易特使期間，有無向愛潑斯坦洩露敏感嘅政府機密。雖然安德魯喺接受11小時扣留調查後獲釋，但佢嘅公眾形象已經徹底崩塌。

雖然澳紐兩國已經表態，但要真正剔除安德魯嘅繼承權，程序上一啲都唔簡單。根據1931年《西敏法令》（Statute of Westminster）以及2013年相關協議，任何影響王位繼承順位嘅法律變動，都需要英國以及其餘14個奉英王為國家元首嘅大英國協王國（Commonwealth Realms）共同同意並修改相關法律。

呢14個國家除咗澳洲同紐西蘭之外，仲包括加拿大、牙買加、巴布亞新畿內亞等。如果其中一個國家唔反對但唔配合立法，可能會引發憲制危機。澳洲政府今日亦表示，會同步致函其餘各個成員國，帶頭推動呢項修法行動。