踏2026年農曆新年前夕，中共中央網信辦正式宣佈展開為期一個月嘅「清朗2026年營造喜慶祥和春節網絡環境」專項行動。今次行動除咗好似往年咁針對網絡謠言、炫富同賭博之外，最引人注目嘅係官方首次明確將「宣揚不婚不育」定性為不良價值觀，要求各大平台嚴厲打擊。消息一出，隨即喺網民之間炸開咗鑊，引發廣泛討論。

根據官方發布嘅文件，今次行動嘅頭號目標係「惡意挑動負面情緒」。網信辦點名批評網上流傳嘅「不婚不育」、「反婚反育」等言論，認為呢啲內容係扭曲價值觀，刻意渲染「婚姻恐懼」同「生育焦慮」，仲會挑動男女對立。

有分析人士指出，北京今次「出重手」管制網絡言論，背後反映出對人口危機嘅極度焦慮。數據顯示，2025年中國新生兒數量跌破 800 萬大關，人口負增長問題持續惡化。官方雖然推出咗唔少鼓勵生育嘅政策，但年輕人依然傾向「躺平」。今次清朗行動透過「封口」方式，試圖抹除網上負面情緒，營造出一種「喜慶祥和」嘅社會假象。

除咗催婚之外，今次行動另一個焦點係整治所謂嘅「數碼餿水」。網信辦指出，而家好多平台充斥住大量利用 AI 技術批次生產嘅垃圾資訊。呢啲內容通常係邏輯混亂、資訊空洞，甚至係對經典文學或歷史典故進行「魔改」。

官方表示，呢啲 AI 生成嘅內容包括「霸道總裁爽劇」、「毒雞湯文」以及虛假嘅專家科普。呢啲資訊不單止浪費網民時間，仲會誤導公眾認知。針對呢類現象，網信辦要求各大平台建立「工作專班」，加強對首頁、熱搜同彈窗嘅巡查力度，一旦發現違規內容，就要即刻下架兼處置相關賬號。

值得留意嘅係，2026年嘅網絡治理似乎更具「硬指標」。除咗網信辦嘅專項行動，公安部日前亦公佈咗《網絡犯罪防治法》草案，強化對 VPN（翻牆工具）同境外 eSIM 卡嘅監管。有法律學者直言，中共嘅網絡治理模式正由行政管理轉向「警務主導」，透過法律手段進一步收窄網民嘅言論空間。

有網民喺討論區留言自嘲：「而家連唔生仔都唔畀講，下次係咪要強制配對？」亦有人擔心，過度嘅網絡審查會令互聯網變成一個大型嘅「局域網」，令中國與世界進一步脫節。網信辦強調，今次行動會持續到春節假期結束，並會及時公佈典型案例以收「震懾」之效。

低生育率係城市化必然嘅結果，全球都係咁。但我黨再加碼，當日親手摧毀地方宗族組織，學埋日韓台擴大城市化，又見到人太多推一胎政策，搞到而家婚育率大鑊過日韓台再返轉頭叫人民生多啲。要人民生嘅係你，唔准人民生嘅又係你，你自己衰但人民唔傻。