一場歷時超過三個幾月、跨越美國十個州份嘅「和平徒步」（Walk for Peace）馬拉松式壯舉，終於喺當地時間20號劃上圓滿句號。約20名來自德州佛寺嘅僧侶，由德州和斯堡（Fort Worth）出發，徒步走咗約3700公里，正式踏入首都華盛頓。呢場活動唔單止喺社交媒體瘋傳，吸引超過200萬人追蹤，沿途更得到成千上萬美國民眾嘅夾道歡迎，為充滿政治分歧同紛擾嘅社會注入一股清流。

呢支隊伍由「香道內觀中心」（Huong Dao Vipassana Bhavana Center）嘅班那卡拉法師（Bhikkhu Pannakara）率領。僧侶自舊年10月26號起行，每日平均步行32到37公里。行程中佢哋經歷咗極端天氣嘅考驗，特別係最近抵達華府前，正值當地近四十年嚟最長嘅寒流，僧侶喺零下15度嘅低溫下，依然披住一身橙色袈裟堅持前行。

旅程並非一帆風順。喺出發初期，隊伍喺侯斯頓附近遭遇車禍，其中一名僧侶受重傷需要截肢。不過，傷患並無阻礙佢哋嘅決心，受傷嘅僧侶最終坐住輪椅，喺華府終點同隊友匯合。

除咗僧侶之外，全場最矚目嘅莫過於隨行嘅狗仔 Aloka。呢隻曾經喺印度流浪嘅「和平犬」，額頭有一個天然嘅心形標記，沿途成為咗隊伍嘅吉祥物。Aloka 唔單止有自己嘅專屬標籤（#AlokathePeaceDog），喺社交平台上更擁有接近100萬粉絲。僧侶沿途細心照顧佢，甚至喺嚴寒天氣下幫佢著上保暖外套同鞋仔，呢份人與動物之間嘅善意，感動咗無數網民。

雖然沿途亦有零星嘅反對聲音，但大多數民眾都表示支持。隊伍所到之處，唔理係基督教教堂、大學校園定係執法部門，都紛紛提供物資同協助。班那卡拉法師表示，呢次步行並非政治運動，而係一種「心靈奉獻」。佢哋希望透過每一步嘅正念（Mindfulness），鼓勵大家喺混亂嘅世界入面搵返內心嘅平靜，並呼籲美國國會將「衛塞節」（佛誕）定為聯邦法定假期。

隊伍最後喺華盛頓國家大教堂同林肯紀念堂舉行咗禪修同祈禱儀式。完成呢場108日嘅「心靈長征」後，僧侶們將會坐巴士返德州，預計喺情人節當日返抵和斯堡。