香港監察喺英國國會發表一份重大問卷調查報告，分析英國政府提出嘅「賺取式定居」（earned settlement）新要求，對持有BNO簽證港人可能帶嚟嘅影響。

發布會由香港監察贊助人、英國工黨國會議員、Rushcliffe選區代表 James Naish 主持，出席同發言人士包括港援共同創辦人兼董事 李凱婷（Catherine Li）、英國港僑協會創辦人 鄭文傑（Simon Cheng），另外亦有多名國會議員到場，包括 Bobby Dean、Fabian Hamilton、Pippa Heylings 同 Mark Sewards。

該份報告長約20頁，由香港監察資深研究同政策顧問 湯柏森（Thomas Benson）撰寫，內容基於香港監察喺2025年12月下旬向在英BNO港人進行嘅大型問卷調查結果。今次調查一共收到超過4,500份回應，係自2023年以嚟規模最大嘅BNO相關調查。

報告主要探討英國內政部喺2025年11月提出、作為《移民規則》（Immigration Rules）改革一部分嘅「賺取式定居」新要求。新安排包括申請人需喺三至五年內達到年收入唔少於12,570英鎊，同英文能力須通過CEFR B2「高中級」水平，較現行B1「低中級」要求進一步提高。

調查結果顯示，只有約12%成年BNO港人表示有信心符合新要求，其中女性同年長港人受到嘅影響尤其明顯。唔少受訪者反映，新門檻一旦落實，BNO家庭要為子女申請定居身分，將會面對極大困難。

英國港僑協會創辦人鄭文傑指出，BNO港人社群普遍對自己喺英國嘅前景感到焦慮同不安，並強調政府有必要正視BNO港人多年嚟對英國社會、經濟同文化所作出嘅實際貢獻。港援共同創辦人李凱婷亦提到，建議中嘅修訂對弱勢群體構成沉重打擊，特別係延長入籍年期，對部分難民同尋求庇護嘅港人影響深遠。

香港監察贊助人、工黨國會議員James Naish表示，BNO簽證計劃當初係喺跨黨派支持下設立，目的係回應當局對香港公民自由嘅打壓，為香港人提供一條安全、清晰嘅英國定居途徑。

佢指出，唔少家庭正正係基於「五年後可申請永久居留」呢個明確承諾，先至作出移居英國嘅重大人生決定，如果相關安排被延誤或改變，將會令好多家庭陷入極度不穩定嘅處境。佢強調，政府必須確保移民改革細節真正反映英國對香港人嘅重大支持，而唔係無意中削弱原有承諾。

報告作者湯柏森就引用其中一名受訪者嘅說法形容，英國嘅移民政策「就好似英國天氣一樣——變幻莫測、轉眼即變」。佢指出，BNO港人係根據英國政府喺2021年提出嘅安排規劃新生活，但當好多人即將達到五年申請定居門檻之際，規則卻突然被改寫，形同「搬龍門」。

湯柏森認為，喺道義同實際層面上，改變BNO計劃規則都屬錯誤做法，唔單止未必達到任何政策效果，反而會對一班相信英國會信守承諾嘅港人造成巨大傷害同長遠不安。