法國政府正式宣布將會全面棄用美國科技巨頭旗下嘅視像會議軟件，誓要喺數碼世界實現「去美化」。由微軟 (Microsoft) 嘅 Teams、Zoom 到 Google Meet，通通都要喺法國公務員嘅電腦入面消失。呢個唔單止係一個軟件採購嘅決定，更加係歐盟喺特朗普政府主導下，對抗美國「數碼霸權」嘅一次強烈反擊。

法國公務員事務及國家改革部長級代表 David Amiel 喺剛過去嘅週一正式公佈咗呢項名為「數碼主權」(Digital Sovereignty) 嘅重磅計劃。根據法國當局嘅時間表，所有法國政府部門必須喺 2027 年前，徹底停止使用非歐洲嘅視像會議解決方案。

意味住咩呢？意味住以後法國官員開會，唔會再收到 Zoom Link 或者 Teams Invite。取而代之嘅，係法國政府自家研發、名為「Visio」嘅視像平台。事實上，呢場「分手」行動已經靜悄悄開始咗，包括法國國防部同國家科學研究中心 (CNRS) 等敏感部門，已經接獲指令要喺 2026 年第一季內完成轉移，率先切斷對美資軟件嘅依賴。

David Amiel 喺聲明入面講得好白：「我哋唔能夠冒險，將我哋嘅科學交流、敏感數據同戰略創新，暴露喺非歐洲參與者嘅風險之下。」佢強調，呢個係為了確保公共通訊嘅安全同保密，亦係法國重奪數碼獨立性嘅具體一步。

有趣嘅係，法國政府揀咗「Visio」呢個名，同微軟本身用開畫圖表嘅軟件 Microsoft Visio 撞晒名，唔知係巧合定係有心向微軟「致敬」。不過，呢個法國版 Visio 確實係百分百「法國製造」。

根據法國數碼事務局 (DINUM) 嘅資料，Visio 係基於開源技術開發，並且寄存在法國達索系統 (Dassault Systèmes) 旗下子公司 Outscale 嘅雲端基建之上。重點係，Outscale 擁有法國國家網絡安全局 (ANSSI) 發出嘅「SecNumCloud」認證。呢個認證喺業內被視為「金鐘罩」，代表數據受到最高級別嘅保護，能夠免疫於外國法律嘅長臂管轄。

除咗基建，Visio 連入面嘅 AI 功能都係用返自己人。佢嘅語音轉文字功能 (Transcription) 由法國初創公司 Pyannote 提供，預計今年夏天仲會引入另一間法國 AI 實驗室 Kyutai 嘅技術做自動字幕。當局聲稱，目前已經有 4 萬名公務員試用緊，目標係幾個月內推展到 20 萬人。

點解法國要搞到咁絕？背後最大嘅推手，其實係對美國《雲端法案》(CLOUD Act) 嘅恐懼。呢條法案允許美國執法機構，喺特定情況下索取美資科技公司儲存喺海外嘅數據。

自從特朗普重返白宮執政超過一年以嚟，佢推行嘅「美國優先」政策令到跨大西洋嘅數據傳輸爭議升溫。雖然美國科技界不斷遊說，話數據儲存喺歐洲就安全，但法國顯然唔受這一套。喺佢哋眼中，只要係美資公司，無論個 Server 擺喺巴黎定係法蘭克福，法律上都係受制於華盛頓。

加上近期發生多宗雲端保安事故，令到歐洲各國對於將雞蛋放喺美國籃入面更加避忌。法國今次係想透過建立一套完全屬於自己嘅生態系統「La Suite Numérique」，除咗視像軟件，遲啲連 Gmail 同 Slack 等工具都可能被自家產品取代。

除咗講主權，法國政府仲攞「慳錢」嚟做賣點。當局估計，每 10 萬名用戶轉用 Visio，每年可以慳返大約 100 萬歐元嘅授權費。聽落好似好吸引，但科技界對於 Visio 能唔能夠完全取代 Teams 或者 Zoom 嘅功能表示懷疑。

大家用慣咗 Teams 嘅生態圈，突然要轉用一個政府開發嘅工具，穩定性、易用性同埋同其他系統嘅兼容性都係大問題。過往唔少政府 IT 項目都係雷聲大雨點小，最後變成「大白象」工程。今次 Visio 能唔能夠打破宿命，真係要放長雙眼睇。

反觀德國喺科技政策上雖然都強調歐洲自主，但手法相對務實啲。不過，德國部分州份其實早已經開始推動棄用 Microsoft 365，轉用 LibreOffice 等開源軟件。如今法國開咗第一槍，全面禁制美資視像軟件，好可能會對德國以至成個歐盟產生骨牌效應。

可以預見，矽谷嘅科技巨頭絕對唔會坐視不理。微軟、Zoom 等公司預料會透過遊說團體向歐盟施壓，甚至可能引發新一輪嘅美歐貿易摩擦。但對於馬克龍政府嚟講，數碼主權係一條唔可以退讓嘅底線。