中巴外交風暴急速升溫！針對巴拿馬最高法院裁定香港首富李嘉誠旗下長和失去巴拿馬運河港口經營權一事，北京方面發出嚴厲警告，揚言巴拿馬將付出「沉重代價」。面對北京施壓，巴拿馬總統穆利諾（Jose Raul Mulino）未有退縮，昨日在網上發文公開反擊，重申巴拿馬司法獨立，絕不屈服於任何霸權威脅。

事緣巴拿馬最高法院上周作出震撼裁決，指長和實業旗下巴拿馬港口公司營運巴拿馬運河巴爾博亞（Balboa）及克里斯托瓦爾（Cristobal）兩個主要港口嘅合約「違憲」。北京國務院港澳辦隨即喺周二（3日）發炮，措辭強硬咁批評巴拿馬當局「罔顧事實、背信棄義」，警告若果「一意孤行」，將要喺政治同經濟上付出「沉重代價」。

面對中方嘅「戰狼式」警告，穆利諾選擇正面交鋒。佢喺 X 平台發文，強調自己「強烈駁斥」中方言論。穆利諾表示：「巴拿馬係一個法治國家，尊重司法裁決，而司法係獨立於中央政府嘅。」佢更強硬補充，巴拿馬外交部將會發表正式聲明回應，並會「採取相應決定」，暗示兩國關係可能進一步緊張。

被視為中資在拉美戰略橋頭堡嘅長和，今次可謂「硬食」一記悶棍。長和附屬嘅巴拿馬港口公司已表明不服裁決，並於2月3日正式啟動國際仲裁程序，試圖推翻判決或索取巨額賠償。

不過，巴拿馬政府似乎已做好「去長和化」嘅兩手準備。穆利諾透露，喺法院裁決生效後，政府已委託丹麥航運巨頭馬士基（Maersk）旗下子公司，暫時接管該兩個碼頭嘅營運權，直至批出新嘅特許經營權為止。此舉被解讀為引入歐洲勢力，以平衡甚至取代中資影響力。

翻查資料，長和自1997年起就開始營運呢兩個位於運河兩端嘅戰略港口，合約原定2021年延長25年。然而，巴拿馬獨立審計長早前對合約進行覆核，發現特許權條款「對該公司構成不合比例嘅偏袒」，甚至出現財政漏洞，建議撤銷合約。

最高法院最終採納審計長觀點，判詞直指合約「沒有任何正當理由」損害國家財政。有分析指，呢個裁決喺法律層面之外，更多係反映咗巴拿馬國內對中資過度擴張嘅擔憂。

這場港口風波背後，美國嘅身影揮之不去。美國總統特朗普多次在公開場合威脅要「奪回」巴拿馬運河控制權，並指責中國透過長和「實際操控」運河。美國國務卿魯比奧（Marco Rubio）早前更親赴巴拿馬施壓，警告中資港口威脅美國國家安全。

事實上，長和早前曾計劃將港口資產出售予由貝萊德（BlackRock）牽頭嘅財團，以減低地緣政治風險，但交易據報因北京反對而受阻。如今巴拿馬法院「出手」廢約，客觀上達成咗特朗普將中資踢出美國「後花園」嘅戰略目標。美國方面亦對裁決表示歡迎，指此舉有助維護運河嘅透明度同法治。

隨著長和提起仲裁，加上北京揚言報復，這場涉及中、美、巴三方嘅角力戰恐怕只係剛剛開始。巴拿馬運河作為連接大西洋同太平洋嘅咽喉，每年處理大量美國貨櫃，其控制權誰屬，將直接左右未來全球貿易格局。