瑞典家居巨頭IKEA（宜家家居）正面臨一場前所未有嘅「寒冬」。就喺尋日IKEA 中國正式關閉咗位於上海、廣州、天津等城市合共七間大型商場。消息一出，震撼成個零售界。有外媒更以「從中產夢到清倉肉搏」形容呢次事件，昔日象徵「中產生活品味」嘅北歐風，如今竟然變成爭崩頭嘅清倉戰場。

今次 IKEA 嘅「動刀」規模絕對唔係講笑。根據 IKEA 中國早前發布嘅公告，由尋日開始，正式停止營運七個「線下觸點」，名單包括：上海寶山、廣州番禺、天津中北，以及南通、徐州、寧波同哈爾濱分店。

喺正式結業前嘅最後幾個星期，多地分店都出現咗恐怖嘅「清倉人潮」。網上流傳嘅片段見到，喺哈爾濱分店嘅清倉現場，原本行開優雅路線嘅 IKEA 瞬間變成街市。大批市民為咗搶購平價貨品，唔單止排隊打蛇餅，甚至有人為咗爭奪特價傢俬發生肢體衝突，場面一度失控。有網民就戲稱，當年大家係去 IKEA 發夢做中產，依家就係去 IKEA 上演「自由搏擊」，反映出內地消費市道低迷下，價格敏感度極高嘅現實。

雖然一口氣閂七間舖，容易令人聯想到外資撤出中國嘅浪潮，但 IKEA 方面就強調呢個係「轉型」。IKEA 中國表示，呢次決定係基於對顧客觸點嘅全面評估，屬於「門店網絡優化」。

佢哋指出，雖然關閉咗七間舊有嘅大型倉儲式商場，但未來兩年會將資源集中喺北京同深圳呢啲一線城市，計劃開設超過 10 間小型門店。呢種新策略似乎係想由以往「行斷腳」嘅巨型藍盒子（Big Box），轉型做更貼近市區、更靈活嘅精品店模式。與此同時，IKEA 亦表明會加強同京東（JD.com）等電商平台合作，實行線上線下雙線發展。簡單嚟講，官方嘅講法係：「我哋無走，只係換個方式生存。」

分析指出，IKEA 今次「斷臂求生」，背後其實係內地經濟環境劇變嘅縮影。

首先，內地房地產市場持續低迷，新樓賣唔出，連帶裝修同傢俬需求都插水式下跌。以前內地中產買樓後，第一時間就係去 IKEA 掃貨，貪佢設計好、價錢合理；但依家樓市泡沫爆破，呢支歌仔已經無得唱。

其次，內地本土品牌嘅崛起亦畀咗 IKEA 極大壓力。現時內地嘅家居市場充斥住大量「平替版」IKEA，由淘寶到拼多多，大量國產品牌以更低嘅價錢、更貼近中國人使用習慣嘅設計（例如更硬嘅床褥、更適合中式廚房嘅收納），成功搶客。加上內地電商物流極度發達，IKEA 傳統嗰種「自提、自運、自裝」嘅 DIY 模式，喺包郵包安裝嘅國產服務面前，顯得有啲「水土不服」。

其實唔止 IKEA，近年多間外資零售巨頭喺內地都紛紛縮減規模。早前家樂福（Carrefour）中國業務崩盤，甚至連沃爾瑪（Walmart）都要調整策略。今次 IKEA 七店齊閂，標誌住過去三十年外資倚靠「大型門店」喺中國狂奔嘅時代正式落幕。

雖然 IKEA 強調中國仍然係佢哋「最重要嘅戰略市場之一」，但面對消費降級同內捲化嘅競爭，呢位來自瑞典嘅藍色巨人，恐怕都要諗計點樣喺「窮遊」與「平替」嘅夾擊下殺出一條血路。