面對中美兩大經濟體嘅夾擊，歐盟終於「坐唔住」，決心要打響「歐洲製造」保衛戰。歐盟工業與貿易專員塞茹爾內 (Stéphane Séjourné) 喺昨日同超過1,100位企業CEO及商界領袖發表聯署文章，強烈呼籲歐盟必須落實「歐洲製造戰略，否則歐洲經濟恐怕會淪為競爭對手嘅「遊樂場」。

呢篇充滿危機感嘅文章，直接點出歐洲工業正面臨存亡之秋。塞茹爾內喺文中直言：「如果冇雄心勃勃、行之有效兼且務實嘅產業政策，歐洲經濟註定會變成競爭對手嘅遊樂場。」佢提到，既然中國有「中國製造」，美國有「購買美國貨」(Buy American) 優先政策，點解歐洲唔可以有自己嘅版本？佢強調，歐洲嘅公共資金必須用嚟促進歐洲嘅生產同高質量就業，主張喺最具戰略意義嘅行業確立「歐洲優先」地位。

今次聯署嘅背景，正正係歐盟委員會即將喺本月稍後時間推出嘅《工業加速器法案》(Industrial Accelerator Act)。呢項法案被視為歐盟針對中國廉價進口商品，以及美國高關稅壁壘嘅「重磅反擊」。法案預計會包含優先考慮本地製造產品嘅條款，意即係政府招標或公共採購時，可能會硬性規定要有一定比例係「歐洲貨」。

不過，要喺歐盟內部達成共識並唔容易。目前歐盟成員國對此意見分歧，形成兩大陣營。以法國為首嘅國家大力支持呢個理念，認為喺地緣政治緊張嘅局勢下，保護本土工業係必須嘅；但另一方面，瑞典、捷克等崇尚自由貿易嘅國家就發出警告，擔心如果強推「買歐洲貨」，唔單止會阻礙外資投資，仲會推高政府招標嘅成本，最終反而損害歐盟嘅全球競爭力。

與此同時，作為歐盟經濟火車頭嘅德國，其態度亦相當關鍵。德國總理默茨自上年5月上任以嚟，一直面對國內經濟疲弱嘅難題。最新數據顯示德國失業人數已突破300萬大關，創下12年新高。默茨政府雖然傳統上傾向支持自由市場，但面對國內工業衰退嘅壓力，亦不得不重新審視點樣透過歐盟層面去挽救製造業。

事實上，歐洲多個傳統工業重鎮，由鋼鐵到汽車製造業，近年都深受能源成本高企同訂單流失嘅打擊。業界普遍認為，如果歐盟再唔出招，供應鏈一旦斷裂，將來想追都追唔返。塞茹爾內形容，歐洲最好嘅答案可以用四個字概括，就係「歐洲製造」。

隨住《工業加速器法案》即將出爐，這場關於係咪要築起「歐洲堡壘」嘅辯論，相信會喺布魯塞爾引發更激烈嘅政治角力。究竟歐盟會選擇全面轉向保護主義，定係會喺開放與保護之間搵到條中間路線，將直接影響未來全球貿易嘅格局。