行政長官李家超早前接受《信報》同《NowTV》聯合專訪時透露，特區政府正準備推出一套全新機制，全面銜接下月全國兩會審議嘅「十五五」規劃綱要，香港將會首次自行制訂一個屬於本地嘅「五年計劃」。佢表明，相關工作會由佢親自統籌，成立一個跨局、跨部門、全政府嘅專班去推進。

李家超指出，今年正正係「十五五」嘅開局之年，規劃綱要草案會勾劃國家未來五年嘅發展藍圖。特區政府已經預早部署，等到具體內容出台之後，會就涉港部分，甚至國家整體布局主動對接。同時，香港自身嘅「五年計劃」亦會就重點發展領域作更細緻安排，希望可以同國家五年、十年，甚至更長遠嘅規劃方向配合。

佢又話，「十五五」規劃唔單止涵蓋經濟同金融，亦包括教育、醫療、房屋同青年發展等多項民生議題，屬於全政府層面嘅工作。作為香港嘅「第一責任人」，佢會大力推動。由於呢個亦係香港第一次制訂「五年計劃」，政府會先同各個持份者溝通，聽多啲意見，等有具體政策方向之後，亦會同社會分享，作更廣泛討論。

談到外訪同對外經貿部署，李家超表示，面對全球地緣政治局勢動盪，香港更加要發揮「超級聯繫人」同「超級增值人」角色，協助企業分散風險、拓展新市場。佢透露，未來出訪會優先考慮中亞同東歐地區，一方面當地有興趣，另一方面亦真係見到存在機遇。

李家超話，呢啲地區發展空間大，大家對接起嚟「一定係雙贏」，唔可以將所有雞蛋放喺同一個籃入面，否則一旦出事，風險會好大。相比其他地方，香港早喺多年前已經開始擴大國際網絡，具備真正「超級聯繫人」嘅優勢。喺協助內地同海外投資項目對接時，香港除咗促成合作，亦會提供經驗同專業支援，幫企業喺新市場趨利避害。

回顧歷史，中華人民共和國自1953年起，參考蘇聯模式，開始以五年為一個周期，對國民經濟同社會發展作中長期規劃，慣稱「五年計劃」，並喺2006年起改稱為「五年規劃」。至於香港，《香港特別行政區基本法》第五條訂明，特區唔實行社會主義制度同政策，會保持原有嘅資本主義制度同生活方式，五十年不變。