美伊關係再次行到十字路口。就喺美國總統特朗普派遣航母戰鬥群壓境之際，伊朗總統佩澤什基安 (Masoud Pezeshkian) 突然拋出橄欖枝，宣稱伊朗「並唔尋求戰爭」，更願意喺特定條件下同美國重返談判桌。

根據最新消息，伊朗總統佩澤什基安喺剛剛過去嘅週六，同埃及總統塞西 (Abdel Fattah al-Sisi) 通電話時，罕有地向西方世界釋出善意。佩澤什基安強調，伊朗伊斯蘭共和國從來都冇、將來亦唔會尋求戰爭。佢用相當務實嘅語氣指出：「我哋堅信，一場戰爭無論對伊朗、對美國，定係對成個中東地區，都係百害而無一利。」

不過，呢位伊朗總統喺向美國「單眼」嘅同時，亦劃出咗清晰嘅紅線。佩澤什基安表明，雖然德黑蘭願意透過對話解決分歧，但絕唔會喺「威脅嘅陰影」下進行談判。言下之意，如果要傾，美國首先要收起嗰副咄咄逼人嘅姿態，唔好諗住用槍指住伊朗個頭嚟逼佢簽字。

特朗普對於伊朗嘅表態顯得相當「 得戚」。佢喺接受訪問時透露，伊朗方面其實已經透過中間人同美國接觸，形容對方係「認真想傾」，講到對方已經「跪低左」咁。

特朗普依舊保持佢一貫嘅「交易藝術」風格，一方面話：「佢哋想傾，咁我哋就睇下傾成點啦 (we’ll see what happens)。」另一方面，佢隻手完全冇軟過。美軍嘅「亞伯拉罕·林肯號」(USS Abraham Lincoln) 航母戰鬥群目前正浩浩蕩蕩駛向中東水域，配合早前部署嘅 B-52 轟炸機，對伊朗形成咗強大嘅軍事威嚇。特朗普甚至直言：「如果傾唔成，咪睇下到時點。」同時暗示，如果伊朗玩嘢，後果會比以前更嚴重。

雖然雙方都有意接觸，但核心分歧依然好似一座大山咁擋喺中間。伊朗外長阿拉格齊 (Abbas Araghchi) 較早前喺土耳其伊斯坦堡發言時補充，如果雙方能夠重建互信，重啟核協議嘅路徑係存在嘅。但佢亦斬釘截鐵咁講，伊朗嘅導彈防禦計劃係「絕對唔可以談判」嘅 (non-negotiable)。

呢點正係特朗普政府最唔滿意嘅地方。白宮方面一直堅持，任何新協議唔單止要限制伊朗嘅核計劃，仲必須包埋限制佢哋嘅彈道導彈研發，以及停止支持區內嘅代理人武裝組織。依家伊朗話「導彈免談」，即係話雙方喺談判門口已經有一隻腳卡住咗。

分析指出，佩澤什基安之所以喺呢個時候放軟身段，除咗美軍壓境之外，國內嘅局勢亦係一大因素。據報伊朗國內近期爆發咗新一輪反政府示威，需然用血腥鎮壓暫時平定了，但美國「極限施壓 2.0」令伊朗經濟持續內傷，德黑蘭當局急需透過外交途徑嚟為國內局勢降溫。

與此同時，國際局勢亦發生緊微妙變化。隨著歐洲對伊朗嘅態度亦轉趨強硬，令伊朗喺外交上更加孤立。喺咁嘅背景下，佩澤什基安向美國示好，好可能係想喺被完全圍堵之前，爭取一啲喘息空間。