委內瑞拉政局出現劇變之後，石油產業亦迎嚟歷史性嘅轉折點。委內瑞拉國會喺當地時間29號正式通過咗油氣法修正案，大幅放寬外國私營企業喺當地石油業嘅投資限制。今次修法被視為係回應美國政府嘅要求，旨在徹底拆解過去幾十年嚟由前領袖查維斯（Hugo Chavez）建立嘅國有壟斷模式，利用外資重振呢個長期陷入困境嘅「石油王國」。

根據新通過嘅法案，最核心嘅改變係取消咗外國公司必須同委內瑞拉國營石油公司（PDVSA）成立合資企業、且由 PDVSA 持有大股嘅硬性規定。以後，只要經石油部批准並證明具備技術同財力，外國私營企業就可以自行管理、開採同銷售原油，唔再需要受制於國營公司嘅官僚架構。

臨時總統羅德里格斯（Delcy Rodriguez）喺簽署法案後表示：「苦難已經過去，好日子就嚟到。」佢預計，隨住法例鬆綁，2026年吸引到嘅外資金額將會達到 14億美元，比2025年大幅增加超過五成。

產量目標每日 150 萬桶 除咗管理權「大放水」之外，修法亦喺稅務上畀咗好大嘅甜頭。新法規定石油稅上限為毛收入嘅 15%，而權利金（Royalty）最高亦只係 30%，甚至喺特定項目下，行政部門有權將稅率調低到 15% 嚟增加競爭力。

事實上，自從美軍喺今年 1 月初採取軍事行動抓捕馬杜羅（Nicolas Maduro）之後，美國總統特朗普就一直向委內瑞拉臨時政府施壓，要求開放呢個全球證實儲量最大嘅油田。目前，美國能源巨頭雪佛龍（Chevron）已經積極擴張當地業務。委國政府目標係希望喺2026年內，將目前每日大約 120 萬桶嘅產量，提升至 150 萬桶甚至更高，藉此解決國內嚴重嘅燃料短缺問題。

雖然修法表面上係「大酬賓」，但有石油分析師指出，委內瑞拉嘅法律透明度仍然係一大挑戰。反對派議員就批評，目前法案賦予政府過大嘅裁量權去批出合約，如果缺乏公眾監督，好容易會滋生新嘅腐敗問題。此外，雖然新法准許引入獨立仲裁機制，唔再局限於委內瑞拉法院審理糾紛，但對於曾經畀馬杜羅政府「充公」過資產嘅外資嚟講，信心嘅恢復似乎仲需要一段時間。

目前，首筆由美國協助銷售嘅 3 億美元石油款項已經匯入委內瑞拉帳戶，反映出兩國能源合作已經開跑。呢次石油業嘅「大私有化」，究竟係委內瑞拉經濟重生嘅靈丹妙藥，定係引狼入室嘅政治籌碼，全球能源市場都喺度密切觀察。