特朗普嘅標誌性對內政策，強力掃蕩移民行動，依家正身陷前所未有嘅公關災難。呢場原本係針對非法移民嘅執法行動，隨住執法手段變得愈嚟愈激進，甚至演變成流血衝突，已經唔再局限於政治圈嘅爭拗，而係喺美國商界、體育界同演藝圈，同時引發一場席捲全美嘅「文化起義」。面對呢場火頭四起嘅反對浪潮，一向強硬嘅特朗普似乎都「嚇親」，罕有地調走前線指揮官嚟止血。

整件事嘅導火線係喺明尼蘇達州發生嘅悲劇。37 歲嘅退伍軍人事務部護士普雷蒂 (Alex Pretti) 被聯邦執法人員制服後，在冇能力反抗下射殺。作為美國公民，普雷蒂嘅死徹底引爆咗民憤。隨住調查細節流出，唔少人發現當時嘅執法手段極其殘暴，連搖滾傳奇「The Boss」Bruce Springsteen都忍唔住出手，喺星期三發佈新歌《The Streets of Minneapolis》，歌詞入面直斥執法人員係「特朗普嘅聯邦暴徒」，描述普雷蒂點樣被毆打後慘死喺雪地入面。除咗音樂界，「Hulk」Mark Ruffalo更加形容呢單案係一場「冷血謀殺」。

商界嘅反應亦都令白宮非常頭痛。Apple行政總裁Tim Cook發出內部備忘錄，表示對明尼亞波利斯發生嘅事感到心碎，強調美國應該尊重每一個人嘅尊嚴。OpenAI 行政總裁奧特曼 (Sam Altman) 亦都同員工講，依家移民及海關執法局 (ICE) 嘅做法「太過火」。甚至連生活風格教母Martha Stewart都喺 Instagram 同佢 290 萬個追隨者講，依家美國人隨時會被襲擊甚至被殺。呢啲平時唔輕易捲入政治爭拗嘅企業大佬一齊發聲，突顯咗特朗普政策喺主流社會造成嘅撕裂。

執法現場嘅混亂並無因為普雷蒂嘅死而停低。雖然特朗普緊急將備受爭議嘅邊境巡邏隊指揮官波維諾 (Greg Bovino) 調職，改由邊境沙皇霍曼 (Tom Homan) 接手，但明尼蘇達州嘅氣氛依然緊張，幾千名聯邦探員仲留喺當地。呢種猶如「戒嚴」嘅景象，連曾經支持特朗普嘅知名 Podcast 主持人羅根 (Joe Rogan) 都睇唔過眼，佢喺節目入面質疑：「我哋真係要變到好似納粹秘密警察 (Gestapo) 咁咩？見人就問『你嘅證件呢？』我哋係咪搞成咁？」

數據上，特朗普嘅民望正喺度「插水」。根據 AP-NORC 嘅最新民調，特朗普處理移民問題嘅支持度由去年 3 月嘅 49% 跌到得返 38%。最令共和黨高層心驚嘅係，連黨內支持者都開始動搖，共和黨人對呢項政策嘅支持率從 88% 跌到 76%。共和黨策略師海耶 (Doug Heye) 直言，白宮依家顯然係「嚇親咗」，因為如果民憤持續落去，今年秋天嘅中期選舉，共和黨隨時會失去對國會嘅控制權。

不過，特朗普嘅「真粉」核心基地依然好硬頸。忠誠支持者魯默 (Laura Loomer) 就公開叫特朗普要「加強力度」，甚至主張要針對特定族群進行大規模驅逐。特朗普本人喺 Fox News 訪問入面，語氣雖然軟化咗少少，話要「降溫」，但佢轉頭又喺社交媒體警告明尼亞波利斯市長費利 (Jacob Frey) 唔好拒絕配合聯邦執法，形容市長係「玩火自焚」。