印度與歐盟歷經長達20年嘅拉鋸式談判後，終於迎來重大突破。雙方自2022年正式重啟自由貿易協議談判以來，逐步喺農業、汽車等一向被視為高度敏感嘅領域取得共識，並於本周正式拍板，達成被形容為「協議之母」嘅歷史性貿易協定。

歐盟同印度於27日同步宣布完成協議文本，內容涵蓋關稅削減、市場准入同投資安排等多個層面。根據協議，歐盟出口至印度嘅97%商品將獲得關稅減免，預計可為歐洲企業每年節省約40億歐元關稅成本。相關協議仍須經雙方立法機構批准，若程序順利，最快可於一年內正式生效。

作為協議核心內容之一，印度同意逐步大幅下調歐盟進口汽車嘅關稅水平。協議實施後，歐洲進口汽車關稅將由現時高達110%，大幅下調至30%至35%，適用於售價超過1.5萬歐元嘅車款，並設有每年25萬輛嘅配額上限。未來，相關關稅更有望進一步降至10%，讓步幅度被形容為前所未見。

除汽車之外，印度亦即時對酒類產品作出重大讓步，承諾將葡萄酒等酒精飲品嘅關稅由原本嘅150%下調至75%，並計劃喺未來數年逐步降至20%，為歐洲酒類出口商打開更大市場空間。

作為交換，歐盟亦作出廣泛讓步，承諾喺未來七年內削減印度進口商品中99.5%項目嘅關稅。當中包括印度具競爭優勢嘅海鮮、皮革與紡織品、化學品、橡膠、卑金屬以及珠寶產品，相關關稅最終將降至零。

不過，雙方亦清楚劃出紅線，指出黃豆、牛肉、糖、稻米及乳製品等高度敏感農產品，將不納入今次貿易協定範圍，以平衡各自國內政治與農業壓力。

歐盟方面表示，該協定有望於2032年前，令歐盟對印度嘅出口額翻一番。具體做法包括取消或下調96.6%貿易商品（以貨值計算）嘅關稅，並為歐洲企業節省約40億歐元、即約48億美元嘅關稅支出。

然而，呢項重大協議亦引起美國方面不滿。美國財政部長貝森特於周三（1月28日）公開表示，對歐盟選擇同印度達成貿易協議「感到失望」，直言此舉反映歐洲將貿易利益置於烏克蘭人民嘅利益之上。

貝森特接受CNBC訪問時指出，歐洲多年來持續購買由印度利用受制裁俄羅斯石油提煉而成嘅成品油，而正因歐盟正同印度單獨磋商貿易協議，歐洲並無意如美國般，對印度商品徵收懲罰性關稅。

歐盟於周二最終敲定與印度嘅貿易協議，官方說法係希望促進雙邊貿易，同時喺全球貿易緊張局勢不斷升溫之際，降低對美國市場嘅依賴程度。

當被問及歐盟與印度，以及其他非美國國家達成嘅貿易協議，會否對美國構成威脅時，貝森特回應表示：「佢哋當然應該做對自己最有利嘅事情，但我必須講，我對歐洲人非常失望。」他進一步指出，呢份協議正好解釋點解歐盟去年拒絕加入美國對印度商品徵收25%關稅嘅行動。美國當時加徵關稅，目標係迫使印度減少從俄羅斯購買石油。

貝森特直言，「歐洲人唔願意同我哋一齊，結果證明，原因就係佢哋想達成呢項貿易協議。」又話「所以，每當你聽到歐洲人談論烏克蘭人民有幾重要嘅時候，記住，佢哋最終係將貿易擺喺烏克蘭人民之上。」

不過，貝森特上周亦曾暗示，鑑於印度近期大幅減少進口俄羅斯石油，美國有可能撤銷早前對印度加徵嘅25%額外關稅。除印度議題外，美國官員亦對歐盟未能履行去年7月同美國達成嘅框架貿易協議中所承諾嘅關稅削減措施表示失望。