Nvidia 之所以喺 AI市場獨步天下，股價升到「to the moon┌」，除咗因為佢哋嘅 GPU 夠快，最核心嘅武器其實係佢哋嘅軟體生態系統 CUDA。外界一直形容 CUDA 係 Nvidia 嘅「最強護城河」，令開發者一旦用咗就返唔到轉頭，局住要捱貴貨買 Nvidia 嘅卡。

不過，根據最新消息，呢條「護城河」可能正面臨崩潰嘅危機！

外國科技圈瘋傳一個消息：有人利用 Anthropic 旗下最強嘅編程 AI 工具「Claude Code」，竟然喺短短 30 分鐘之內，成功將原本專屬於 Nvidia 嘅 CUDA 後端代碼，移植到競爭對手 AMD 嘅 ROCm平台上運行！

大家試諗下，以前要做這種「搬家」工程，即使係資深工程師團隊，可能都要搞幾個月甚至半年，仲要面對各種兼容性嘅地獄 bug。但今次，AI Agent（代理人）竟然可以自動識別、自動轉換，半個鐘頭就搞掂！網上甚至有開發者驚呼：「This is the end of the CUDA Moat」（這就是 CUDA 護城河的終結）。

黃仁勳一直強調 Nvidia 賣嘅唔單止係晶片，而係成個「解決方案」。因為全世界嘅 AI 模型、科學計算大部分都係用 CUDA 寫嘅，如果你想轉用 AMD 或者 Intel 嘅卡，原本嘅程式根本跑唔郁。呢個就係點解澳洲嘅大學例如蒙納許大學 (Monash University)同數據中心巨頭NextDC，喺過去一年寧願畀幾十億，都要排隊搶購 Nvidia 嘅 H100、H200 晶片，建立所謂嘅「主權 AI 雲端」。

但係，如果 AI 本身已經進化到可以自己幫你「改 code」，將 CUDA 嘅程式瞬間翻譯成 AMD 能夠讀懂嘅語言，咁 Nvidia 嘅獨家優勢就會被大幅削弱。一旦軟體不再受限制，市場就會回歸到「性價比」嘅比拼。到時，AMD 嘅 GPU 如果平一半但效能差唔多，企業老闆會點揀？答案顯而易見。

當然，我哋都要客觀啲睇。據專家分析，雖然 Claude Code 表現驚人，但目前的測試主要係針對結構相對簡單、模組化程度高嘅程式碼。因為 AMD 嘅 ROCm 喺設計上本身就高度對齊 CUDA，所以 AI 翻譯起上嚟特別順手。不過，如果涉及一啲極度複雜、深度依賴 GPU 硬體微架構嘅大型專案，目前的 AI Agent 未必能夠完全取代人手調校。

但科技發展一日千里，今日嘅「簡單移植」，下個月可能就變成「完美兼容」。這對於正積極擴張 AI 版圖嘅巨頭來講，係一個極大嘅警號。