美國總統特朗普嘅健康狀況再次引發外界高度關注。當地時間22號，特朗普喺瑞士達沃斯（Davos）出席世界經濟論壇（WEF），為佢倡議嘅「和平理事會」（Board of Peace）進行簽署儀式。不過，傳媒嘅焦點並唔係落喺份文件度，而係特朗普左手背上一塊非常明顯嘅深紫色瘀青。

現年 79 歲嘅特朗普喺儀式上面，當佢執起筆準備簽名嗰陣，鏡頭清楚捕捉到佢左手背有大面積嘅瘀傷，顏色呈深紅同紫藍色。由於特朗普過去一年多次被發現右手有類似傷痕，今次「轉移」到左手，即刻令到社交媒體「爆炸」，網民紛紛猜測佢係咪身體出咗咩大問題。

有啲網民質疑呢啲係「吊鹽水」或者長期注射留低嘅針孔瘀血，甚至有人聯想到更嚴重嘅血液循環問題。面對排山倒海嘅揣測，白宮發言人萊維特（Karoline Leavitt）隨即補鑊，發聲明解釋指，特朗普係喺活動期間，「唔小心將左手撞到簽名檯嘅檯角」，所以先至會搞到瘀咗一塊。

不過，白宮嘅「撞檯論」似乎未能完全平息疑慮。事實上，特朗普早前接受《華爾街日報》訪問時，就曾經親口承認過自己手部容易出現瘀傷嘅「真相」。佢透露，自己因為想保護心臟，一直有服用阿士匹靈（Aspirin）嘅習慣，而且劑量仲高過醫生建議嘅水平。

特朗普形容自己係個「迷信」嘅人，佢話：「佢哋話阿士匹靈可以稀釋血液，我唔希望流過心臟嘅血係濃稠（thick）嘅，我要佢哋清澈而且流通。」由於阿士匹靈會令血液變稀，容易造成皮下出血，所以就算係好輕微嘅碰撞，喺特朗普身上都會變成好似「大件事」咁嘅瘀傷。

除了手部瘀傷，特朗普嘅健康報告亦顯示佢患有「慢性靜脈功能不全」（Chronic Venous Insufficiency, CVI）。呢種病常見於 70 歲以上嘅長者，主要係因為靜脈瓣膜功能減退，導致血液淤積喺下肢，引起腫脹同皮膚變化。去年更有相片影到佢對腳有明顯浮腫，雖然醫生建議佢著壓力襪，但特朗普就嫌唔舒服，堅持唔肯著。

對於外界一直質疑佢「精力大不如前」，甚至影到佢喺公開場合「瞌眼瞓」，特朗普喺空軍一號受訪時反擊，指自己只係「閉目養神」，仲強調自己基因強大，體力完全無問題。

隨住特朗普邁向 80 大壽，佢嘅一舉一動都俾人用放大鏡去睇。雖然白宮多次強調總統健康「極佳」，但頻繁出現嘅瘀傷同需要用化妝品去遮掩傷痕嘅舉動，難免令公眾覺得白宮喺總統健康資訊方面唔夠透明。