美國同世界衛生組織（WHO）長達 78 年嘅「親密關係」正式畫上句號。美國政府喺當地時22號宣佈，正式完成退出世衛嘅所有法律程序。呢次「分手」分得相當難睇，雙方唔單止為咗成2.6億美元嘅欠會費嘈到拆天，世衛總部仲拒絕交還美國國旗，令呢場全球公共衛生界嘅「世紀離婚」充滿火藥味。

美國總統特朗普喺2025年上任第一日就簽咗行政命令，要求美國退出世衛。經過一年嘅通知期，呢項決定今日正式生效。國務卿盧比奧（Marco Rubio）同衛生部長小羅伯甘迺迪（Robert F. Kennedy Jr.）發表聯合聲明，話世衛喺新冠疫情（COVID-19）期間處理得一塌糊塗，仲形容世衛已經變成「政治化同官僚化」嘅工具，背棄咗核心使命。聲明仲感性咁講到，退出世衛係為咗「幫嗰啲喺安老院孤獨離世、或者被限制措施搞到破產嘅美國人攞返公道」。

不過，退會過程就引起法律爭議。根據美國法律，退出國際組織前要交清所有欠款。世衛指出，美國仲欠緊2024同2025年總共約2.6億美元嘅會費，如果唔交錢，退會手續就唔算正式完成。但美國國務院官員就「老定」咁反駁，話協議入面冇寫明一定要畀咗錢先可以走，仲話「美國人已經畀得夠多」。由於美方拒絕畀錢，世衛總部至今都未肯交還之前掛喺出面嘅美國旗，雙方陷入僵局。

美國一直係世衛最大嘅金主，貢獻咗成個組織接近18%嘅預算。依家呢位「大老細」走人，世衛即刻爆發嚴重財政危機。據報世衛已經裁減咗一半嘅管理層，仲預計喺今年年中之前會炒咗四分之一嘅員工。雖然微軟創辦人標基（Bill Gates）話會繼續遊說美國重返，但外界普遍認為，特朗普政府短時間內都唔會返轉頭。

唔少公共衛生專家對美國嘅「孤立主義」感到非常擔心，佐治城大學法律專家哥斯汀（Lawrence Gostin）警告，美國退出世衛之後，將會失去獲取全球即時疫情數據嘅管道，特別係流感病毒嘅監測。如果攞唔到第一手數據，美國藥廠喺研發疫苗同藥物方面嘅速度可能會落後全球。雖然美方強調會同其他國家建立「直接合作」，但專家質疑，喺目前關稅戰同外交關係緊張嘅情況下，其他國家係咪真係願意私下同美國分享關鍵資訊。